«Илышым илен эртараш пасу гочын вончымо гай огыл», – манеш марий калык. Чынак, чылаж годым мемнан илыш корнына тасма гае огеш ярымалт. А илалше еҥ шке илыме курымыштыжо кунар неле-йӧсым да шере-кочым чыта? Нуно тидын нерген кеч ик татлан мондышт манын, ме, Кораксола тӱвыра пӧрт пеленысе «Муро кумыл» фольклор ансамбльын участникше-влак, Кинер кундемыште илыше эн кугу ийготан ковайна-влакым 8 Март пайрем дене саламлаш мийышна.
Кораксола ялыште илыше эн кугу ийготан еҥ – ӱмыржӧ мучко «Авангард» колхозышто тыршыше, ончыл трактористке Зинаида Михайловна Сергеева, тудо вашке 93 ийым тема. Тылыште тыршыше ӱдырамаш-влак кокла гыч иктыже.
А Шӱргыялыште шочын-кушшо да тыштак илыше, шке ӱмыржым Шӱргыял школ дене кылдыше, 96 ияш Ольга Порфирьевна Ильина эше мыйын авамынак икымше туныктышыжо лийын. Кызыт Морко посёлкышто илыше, Шӱргыялыште шочшо, аваж дене коктынат Шӱргыял школ пӧрдемыште туныктышылан тыршыше Зинаида Александровна Емельяновам кажне 8 Март денак саламлаш тыршена.
Тыгак Шӱргыялыште пел курым утла пырля илыше мужырым, Зинаида ден Владимир Кузьминмытымат, пайрем дене саламлашлан миен коштынна.
Ярансола ялыште ынде 58 ий пырля илыше Лидия ден Виталий Сергеевмыт мемнан мийымынам куаненак вученыт. Тыгак Ярансола ялыште илыше эн кугу ийготан Анна Рыжова ден Татьяна Яковлевамат саламлаш пурыде ыжна чыте.
А пошкудо Алсолашке Татьяна Афанасьева деке кузе куанен коштына! Татьяна Васильевнан йолжо коршта гынат, мемнан мийымылан садыгак шыргыжалын колта.
Йыр ялыште илыше Зоя ден Василий Уразаевмыт могай ойго гоч вонченыт, илышын кочо лемжым тамленыт?! Нуно шке йӧратыме Саша эргыштым СВО-шко ужатеныт да тетла чонаным ужын огытыл.
Шоналтетат, кунар нелылыкым чыташышт пернен илыме курымыштышт нине илалше еҥ-влаклан. А пайрем кечын саламлаш миет гын, кажныже кеч ик изи татлан шке ойгыжым монда. Тидыже илышыште эн тӱҥ огыл мо? Таза да пиалан лийза, Кинер кундемыште шочын-кушшо да тудо мландыштак шке ӱмырдам шуйышо шергакан илалшына-влак!
Елена Григорьева, Кораксола тӱвыра пӧрт вуйлатыше.