Наталия Басова, У Торьял район Кугу Нурмо ял:
– Мыйын авам, Роза Леонтьевна Блинова, У Торъял район Максакродо ялеш шочын-кушкын, пошкудо Эшпайродо ялеш ешым поген. Кугу Нурмо ялыште 38 ий ила. Пелашыже Анатолий Степанович дене кок ӱдырым ончен куштеныт, эше ончаш налме кум ӱдырым йол ӱмбак шогалтеныт. Авамын 12 уныкаже, ик кугезе уныкаже улыт.
Тудо ӱмыржӧ мучко Кугу Нурмо тӱвыра пӧртыштӧ арулыкым эскера. Мураш пеш мастар, тӱвыра пӧрт пеленысе «Шонанпыл» фольклор ансамбль дене район да республик мучко концерт дене коштын.
Авам дене кугешнена, тудым йӧратена да чаманена, поро шӱм-чонан улмыжлан таум каласена.