Тыге маналтеш Российыште тунемше-влак коклаште эртаралтше ик конкурс. 7-12 октябрьыште Калуга областьысе «Этномир» этнографический парк-тоштерыште «Добрые экспедиции» форум эртаралтын. Тушко 10-17 ияш 160 подростко да 40 кугыеҥ миеныт.
Кодшо кеҥежым «Добро не уходит на каникулы» всероссийский конкурсышто участвоватлаш Йошкар-Оласе 29-ше №-ан школын «Наше время» йоча организацийжын «Ритм сердца» волонтёр отрядше 2018-2019-ше тунемме ийыште шуктымо пашаж нерген возен колтен. Тыге «Ритм сердца» отряд «Лучшие практики» номинацийыште Российысе 40 эн сай волонтёр отряд-влак тӱшкашке логалын.
Тудым «Добрые экспедиции» форумышко ӱжыныт. Калуга областьышке волонтёр отрядын чолга участникше-влак Анастасия Пчёлкина, Дарья Кудрявцева, Мария Разуваева, Антонина Зверева да «Наше время» йоча организацийым вуйлатыше Лариса Анатольевна Бобик миен коштыныт.
Школысо йоча организацийыште тӱрлӧ направлений дене паша ышталтеш. Тунемше-влак коклаште тидлан председатель М.Разуваева вуйын шога. 6-шо ден 7-ше класслаште тунемше-влак «Школа будущего лидера» программе дене тӱрлӧ вере участвоватлат. 8-11-ше класслаште тунемше-влак «Ритм сердца» волонтёр отрядыш чумыргеныт. Тыште Д.Кудрявцева ден А.Зверева творческий направлений почеш пашам виктарат, А.Пчёлкина –волонтёр отрядын лидерже.
Волонтёр отряд-влак куд кечыште опытышт дене вашла палдареныт, шке проектыштым араленыт. Нунылан ятыр образовательный программе лийын, йоча пресс-центр пашам ыштен.
Йоча-шамыч Калуга областьысе волонтёр организаций-влак дене палыме лийыныт, «Союз пионерских организаций – Федерации детских организаций» ушемым вуйлатыше И.И.Фришман дене вашлийыныт, акцийым пырля эртарыме нерген мутланеныт. Тыгак «Я волонтёр. История неравнодушных» кинофильмым тӱшкан онченыт да тудым каҥашеныт.
Тиде форум тыглай мероприятий огыл, а йоча чоныш порылыкым «шавыше» событий. Ӱдыр-рвезе-влак социальный проектым возеныт, оҥай экскурсийлашке миен коштыныт да пагалыме еҥ-влак дене мутланеныт. Социальный проектирований дене налме опытышт илышыште кӱлеш лийшаш.
Анастасия Пчёлкина:
– Мыланем «Этномир» парк-тоштер путырак келшен. Тудо Российыште ик эн кугу да мотор верлан шотлалтеш. Тудым эше моторлыкын модельже маныт. Мемнан волонтёр отряднан ТОП-40 манмышке логалмыжлан моткоч куаненна. Ме Калугыш 6 октябрьыште миен шуынна. Ме «Гималайский дом» апарт-отельыште иленна. Вес кечынжак форумым почмо деч вара, 16 командылан пайлалтын, проект-влакым возаш тӱҥалынна. А темыжым шке шупшын луктынна. Командыланна Свердловск областьыште коворкинг-рӱдерым ыштыме нерген проектым шонаш логалын. Нине проект-влакым кундемыштына илышыш шыҥдараш лийме шонымаш дене ме тудым конден кертынна. Форум кугу опытым пуэн. Грант проектым возаш тунеммыжак мом шога!?
