Кугу Ачамланде сарыште сеҥымылан 80 ий темме вашеш элыштына ятыр мероприятий эртаралтеш. Нунын кокла гыч «Послы Победы. Москва» всероссийский слётым палемдыман. Тусо сомылым виктараш кугу элна гыч 10 кураторым ойыреныт. Лу эн чолга-влак коклаште Марий Эл гыч – Илья Пасеев.
Изинек чолга да чулым
Илья Советский посёлкышто шочын-кушкын. Тысе кумшо номеран школышто тунемын.
– Мый изи годсек чыла палаш, тӱрлӧ вере шуаш тыршыше кушкынам. 2018 ий 30 декабрьыште молодёжь мунчалташ иян курыкым ыштен. Курык сайын пеҥгыдем шуын огыл, а мый тудым йоҥылыш шалатенам. Тыге Советский районысо администрацийын молодёжный политике, спорт да туризм пӧлкажым вуйлатыше Татьяна Николаевна Чепайкина дене палыме лийынам. Тудак мыйым добровольчество корныш шогалтен. Верысе молодёжь рӱдер дене пырля тӱрлӧ поро пашам шуктенна, – мутланымашым тӱҥале самырык еҥ.
Шкеж деке ӱжын
Студент лиймеке, Илья Йошкар-Олаште поро пашам шуктышо иктаж организацийыш ушнаш шонен. Тыге Марий Элысе Калык фронтысо Молодёжкын координаторжо Анна Вылегжанина дене палыме лийын. Анна рвезылан волонтёр-влак дене пырля 2023 ийыште Курскыш каяш темлен. Илья вигак келшен.
– Калык фронтын еҥже-шамыч дене Курск областьыш гуманитарный миссий дене тарваненна. Тушто ме складыште пашам ыштенна, сусыргышо салтак-шамычлан икымше да психологический полышым пуэнна, тыгак кок эл кокласе чекыште илыше-шамычым эвакуироватлаш полшенна. Туштак мыланем «Всё для Победы» фондын кураторжын сомылжым виктараш темленыт. Ончыч лӱдыкшын чучын. Но салтак-шамычлан полшаш шонымаш виянрак лийын, садлан келшенам.
Тылеч вара СВО кайыме верыш гуманитарный полышым наҥгаенна. Тушто мо ышталтмым шке шинча дене ужын, салтак-влаклан могай полыш, сату да моло арвер кӱлмым шке умыленам. Чоныштем салтак-влак да эл верч азапланымаш эшеат кугемын, – мане Илья.
Икмыняр гана
«Сеҥымашын посолжо-влак» конкурсыш йодмашым Илья икымше гана 2023 ийыште колтен. Тунам рвезе эн тале-влак радамыш логалын огыл гынат, волонтёр семын Сеҥымаш парадыш ойыралтын.
– Тидыже кумылем нимынярат волтен огыл. Ик ий гыч уэш йодмашым колтенам да волонтёр семын логалынам. Тунам чоныштем каласен моштыдымо шижмаш озаланен. Вет Сеҥымаш парадым кажне еҥлан ужаш пиал огеш логал. Тушто мый ветеран-шамыч дене шинчаваш мутланенам, тидын дене моткоч кугешнем. Кажне салтакын историйже дене палыме лийынам. Эсогыл 1945 ий 9 майыште Икымше Сеҥымаш парадыште участвоватлыше ветеран дене кутыренам, – каласкалыш И.Пасеев.
Лу эн тале-влак коклаште
Эше ик ий гыч чолга еҥ Сеҥымашын волонтёржо-шамычын кураторышт лияш йодмашым колтен. Тушко кугу элна гыч лу эн-энжым ойырат. Нуно коло волонтёрым пеленышт пеҥгыдемдат да пашам виктарат.
– Тидын нерген пален налмеке, чот йывыртенам. А эшеат чот лӱмгечылан пӧлеклалтше Сеҥымаш парадыште волонтёр-шамычым курироватлаш тӱҥалмемлан куаненам. Кызыт моло куратор да волонтёр-шамыч дене шушаш мероприятийлан чот ямдылалтына. Кугу Ачамланде сарыште сеҥымылан 80 ий темме вашеш пӧлеклатше тӱҥ мероприятийлаште пашам шукташ тӱҥалына. Ты кугу пайремыште Марий Эл гыч чылаже кумытын лийына: мый куратор семын да кок волонтёр. Тушко ойыралтмынам моткоч кугу лектышлан шотлем, да тидын дене моткоч кугешнем, – палдарыш куратор.
Поро паша, чынжымак, ончыко рыҥ каяш полша. А кунам самырык еҥ-влак тыгай сомылым виктарат, элнан да кундемнан ончыкылыкшо верч сай ӱшан уло. Илья Пасеев – тидлан пример.
И.Пасеевын архивше гыч налме фото.