Морко посёлкышто шочын-кушшо да тысе 2-шо №-ан школым тунем пытарыше Иван Полатов волонтёр пашалан кумылаҥын. 25 ияш рвезым поро кумылан пашам шукташ кызытсе илыш ситуаций таратен. Тыге тудо тӱня мучко эл-влакым ужын кошташ шонымашыжымат илышыш шыҥдара. Тыгай йӧн нерген пырля ик классыште, а кызыт Германийыште тунемше ӱдыр каласкален. Тений февраль гыч Ваня Польшышто волонтёрлан пашам ышта.
– Иван, шке нерген утларак каласкале: кушто тунемынат, могай профессийым налынат?
– Школ деч вара илыш корнем МарГУ дене кылденам ыле. Тушто «Материаловедение и технологии материалов» специальностьым налынам, бакалавр лийын лектынам. Тунемме годымак Йошкар-Оласе ЗПП-ште инженерлан ик ий пашам ыштен онченам. Дипломым налмеке, мылам вигак армийыш каяш логале, ВДВ-ште служитленам. Тушеч пӧртылмеке, 2018-2019 ийлаште «Морко мланде» райгазетыште верстальщиклан пашам ыштенам.
– А йотэлыш кузе логалынат?
– Тӱнямбал проект-влакым илышыш шыҥдарыше волонтёр организацийым кычал муынам да проектыште участвоватлаш йодмашым колтенам. Вашмут толмеке, кӱлеш документым, оксам погышым. Мыняр окса кӱлмӧ волонтёрствын могай йыжыҥже дене кылдалтме деч шога. Тиде – шкешотан паша лагерь. Тылеч ончыч 2019 ий июль-августышто ик тылзе Францийыште лийынам. Тушто чылажланат шке тӱлыман ыле.
– А Польшышто вес семынрак тугеже?
– Францийыште улмо годым ЕКС-н (Европейский корпус солидарности) кужу жаплан волонтёр пашам шуктымо шотышто проектше нерген пален налынам. Йодмашым колтенам. Кужу жаплан палемдыме проектыште участвоватлыме годым корнылан да визылан, тыгак илымылан оксам пуат. Кызыт мыланна тылзеш 1000 польский златыхым (тиде 17 тӱжем теҥге утларак лиеш) тӱлат. Ты окса дене ме кочкына, тыште илаш кӱлшӧ наста-влакым налына.
– Те шукын улыда мо? Кушто иледа?
– Польшыш шымытын миенна. Россий гыч шкетын улам. Мый денем пырля британец, турко, итальянец, словачке да кок француз пашам ыштат. Ме Краков ола деч тораште огыл верланыше Климонтов ялыште ондакысе школышто илена. Тудым шукерте огыл ачаленыт, сандене илаш чыла йӧн уло. Кочкаш, канаш, мушкылташ, шкем тӧрлаташ посна пӧлем-влакым йӧнештарыме.
– Кажне кечын шуктымо сомылдам пален налме шуэш.
– Мемнан паша кечына 9 шагатлан планёрко дене тӱҥалеш. Тушто координаторна кече але арня мучко могай пашам ыштышаш нерген каласкала. Тылеч вара ме шкеак ты але вес заданийым шуктымо шотышто пайлалтына. Икте садыште иктаж сомылым ышта, весе школышко туныкташ каен кертеш, а кумшо – иктаж-мом чоҥаш але ачалаш. Нине паша-влакым волонтёр-влак мом ыштен моштымыштым да кумыл йодмыштым ончен шуктат. Кочкаш черет дене шолтена, тӱшкан кочкына. Чыла сомыллан шагат йотке пеҥгыде график уке, тудым эррак але варарак пытарен кертына. Каныш кечылаште вес олалашкат каяш лиеш, но кызытеш вируслан кӧра тидым ышташ неле. Кастене чылан пырля улына: фильмым ончена, ӱстембал модыш дене модына, тулото воктене мутланен шинчылтына…
– А тендан шуктымо проектын тӱҥ шонымашыже могай?
– Ме тӱҥ шотышто Европышто илыше-влаклан келшен толшо принцип-влакым аклаш туныктена. Теве еҥ-влаклан сад участкылаште мландылан эҥгекым кондыде да химикатым кучылтде пашам ыштыме сомылым умылтарена, транспортлан бензин ден керосиным шагалрак кучылтмо, куштырам тӱрлӧ семын шеледаш кӱлмӧ нерген каласкалена. Тылеч посна школ ден йочасадлаште англичан йылмым туныктена. Тӱрлӧ мероприятийым эртарена, мутлан, музыкальный фестивальым.