Банкысе счётышто да картычкыште кийыше оксам аралаш да мошенник-влак деч шекланаш кӱлмӧ нерген чӱчкыдын ойлат. Осал шонымашан еҥ-влак кусараш лийдыме пого (недвижимость) денат шакше пашаштым ыштен кертыт. Нунын оптышышкышт логалаш огыл
манын, мом эн ончыч шотыш налман?
И.МАКАРОВ. Кужэҥер район.
Юрист Алексей ИНОРОДЦЕВ вашешта:
– Айдеме кусараш лийдыме погыжо (недвижимость) дене лишыл жапыште нимогай сделкым ышташ огеш шоно гын, мошенник-влак деч аралалташ манын, Росреестрыш кеч-могай сделкым туддеч посна ышташ чарыше йодмашым пуэн кертеш. Тыгай йодмаш лиймеке, записьым ЕГРН ыш пуртат. Тиддеч вара пого оза деч посна пуымо документ-влакым (мутлан, доверенность почеш) ончаш огыт тӱҥал, тудым документым пуышылан пӧртылтат. Тыгай йодмашым паспортым але кусараш лийдыме погылан права шотышто документым йомдарыме, тыгак кужу жаплан вес вере илаш кайыме годым ышташ уто огыл. Тудо илалше еҥвлакынат (лач нуно эн чӱчкыдын ондалалтыт) погыштым мошенник-влак деч аралаш полша. Кызыт тӱрлӧ ойпидышым электрон йӧн дене ышташ лиеш. 2019 ий годсек пого шотышто сделкым электрон йӧн дене (кидпале олмеш усиленный квалифицированный электрон подпись (УКЭП) шындалтеш) пого озан кагазеш возымо келшымашыже улмо годым веле ышташ лиеш. Каласыман, тыгай келшымашым погын озаже Росреестрын верысе пӧлкашкыже ончылгоч колтышаш. Икманаш, пого озан разрешенийже деч посна электрон документ почеш (мутлан, ужалыме-налме шотышто электрон документ) погылан правам регистрироватлаш огеш лий. Электрон йӧн дене документым регистрацийыш кугыжаныш кучем, верысе самоуправлений орган-влак, нотариус але кредитный организаций веле колтен кертыт. Мошенник-влак деч аралалташ манын, Росреестр тыгак чыла еҥлан ЕГРН-ышке электрон почтын адресшым пурташ темла. Тиде адресыш кугыжаныш пӧлка пого озалан тӱрлӧ кӱлешан увертарымашым колтен кертеш, тыге мошенник-влак дечат аралалташ йӧн лиеш. Погым айдеме пого озан доверенностьшо почеш ужала гын, тыгай доверенностьын чын улмыжым Федеральный нотариальный палатын официальный сайтыштыже (доверенностьын реквизитшым кучылтын) тергаш лиеш. Тыгай погым налме але ужалыме годым иктажмогай ешартыш йодыш але умылыдымаш лектеш гын, тиде сферыште ыштыше юрист але адвокат деке каяш ӧрман огыл.