Поэзий конкурсым иктешлат

4 декабрьыште Йошкар-Олаште Сеҥымашын ХХХ идалыкше лӱмеш тӱвыра полатыште «Поэзия Красного города» VI Российысе конкурсым иктешлат.

Тений тудо «Поэзий» номинаций дене гына эртаралтын. Тушко Российын 57 регионжо гыч 400 утла участник шке пашажым колтен, республикна гыч – 30 автор.

20 ноябрьыште конкурсын очный этапше лийын. Тушто 40 участник выступатлен. Вес кундем гыч толшо-влаклан Йошкар-Ола мучко экскурсийым эртарыме, тоштерым ончыктымо. Тыгак 150 участникын пашажым жюри видео дене аклен. Лауреат-влаклан дипломым, ойыртемалтше-влаклан спецдипломым, участник-влаклан сертификатым кучыктат.