Советский районысо Кужмарий тӱҥ школ – республикыштына ик эн тошто школ. 27 ноябрьыште тудлан 155 ий теме.
Жапше годым тыште 200 утла йоча тунемын. Но саман шкенжым налеш. Таче кечылан школышто 29 икшыве шинчымашым пога, нунын дене 13 туныктышо пашам ышта. Йочасад группышто 11 йоча дене 2 воспитатель тырша. Тидыже чоным чотак корштара.
Нурминскийлан кӧра
Историйым ончалаш гын, 1870 ийыште Виче (Вятский) губернийысе калык училищын инспекторжо Сергей Андреевич Нурминский Люперсола черкыште тысе юмынъеҥ дене ялеш церковно-приходской школым почмо нерген каҥаша. Казанский учебный округ тиде йодмашым шукта.
Но Люперсолаште келшыше оралте лийын огыл, садлан тӱҥалтыш школым Кӱверсола ялеш вераҥдат. Тыште икымше урок 25 сентябрьыште эртаралтеш. А 1870 ий 27 ноябрьыште школ почылтеш. 1931 ийыште тудым Кужмарийыш кусарат, да шымияш школ лиеш. 1962 ий гыч кандашияш школ семын пашам ышташ тӱҥалеш.
1965 ийыште ты кундемысе калык моткоч чот куана: школ 320 верлан келыштаралтше у оралтыш вонча. Чынжымак, тунам йоча шуко лийын, школ мӱкш омартала гӱжлен. Садлан 1966-1967 ийлаште кандашияш школ кыдалашыш школыш савырна. Но 2005 ий гыч тӱҥ школ семын пашам ышташ тӱҥалеш. 2024 ийыште йочасадымат школыш ушат.
Пеш чолга улыт
Таче школ шке семынже ила. Тудым Софья Геннадьевна Кугергина вуйлата. Шагалын улына манын, вуйым сакен огыт шинче. Тӱрлӧ олимпиадыш, мероприятийыш ушнат. Шке коклаштыштат акций-влакым эртарат, концертлаште выступатлат. Теве Аван кечыж вашеш Кельмаксоласе тӱҥ школ дене пырля калыклан кугу концертым шынденыт. А тиддеч ончыч, 13 ноябрьыште, школышто йӱлаш пурышо ярмиҥгам эртареныт. Йоча-шамыч шке ыштыме кочкышым, кидпашаштым ужалкаленыт. Тыгак школ Виктор Бурлаков лӱмеш верысе тӱвыра пӧрт да библиотеке дене кылым куча. Нунын эртарыме чыла мероприятийыш кумылын ушнат.
А сентябрь тӱҥалтыште школ пырдыжеш специальный сарзе операцийын участникше, лейтенант Александр Рябчиковлан мемориал оҥам почыныт. Самырык герой СВО-што сарзе порысым шуктышыла вуйым пыштен. Шарнымаш оҥа Кугу Отечественный сарын геройжо Николай Келеев да Чечняште лийже сарын геройжо Алексей Николаевлан вераҥдыме тыгай шарныктыш-влак семынак йоча-шамычлан элнам чот йӧраташ да аралаш кӱлмӧ нерген шижтара.
Поснак кугу таумутым каласыме шуэш Кужмарий школын туныктышыжо-влаклан. Лач нунын тыршымышт дене йоча-влак тӱрлӧ сеҥымашышке шуыт, шочмо кундемым йӧраташ да пагалаш тунемыт. Тӱрлӧ жапыште тыште пашам ыштеныт Ч.М.Сапаева, И.К.Шашкова, С.А.Куклин, Н.Ф.Куклина, А.И.Богатырев, А.А Микин, Ф.С.Данилова, А.В.Александров, З.Б.Глушкова, И.М.Козырев да молат.
Ӱмырет кужу лийже, Кужмарий школ! Тыште, чынжымак, чолга тунемше-влак шинчымашым налыт. Тидым ме шкеак ужын толна.
Ирина Степанован да школын альбомжо гыч налме фото-влак.