25 январьыште У Торъял посёлкысо рӱдӧ библиотекыште писатель, поэт, педагогике науко кандидат, РСФСР школын сулло туныктышыжо, икымше марий «Букварьын» авторжо Василий Фёдорович Сапаевын шочмыжлан 100 ий теммылан пӧлеклалтше «Писатель. Учёный. Педагог» мероприятий лийын.
Пайремыш кугу уна-влак деч посна В.Сапаевын родо-тукымжо, районысо туныктышо ден тунемше-влак миеныт. Василий Фёдоровичын илыш корныжым Светлана ӱдыржӧ, пашам пырля ыштыше коллегыже Елизавета Лебедева шарналтеныт. М.Новикова ден Л.Садовина Сапаев тукымвожым шымлымышт дене палдареныт.
Тыгак «Сапаевские строки» сылнымут фестиваль лийын. Районысо тунемше-влак В.Сапаевын почеламутшо ден басньыже-влакым сылнын лудыныт.
Василий Сапаев Човыксола ялеш 1923 ий 3 январьыште шочын.
У Торъял районысо педучилище деч вара ятыр вере тӱҥалтыш класслам туныктен. Кугу Отечественный сар деч вара Н.К.Крупская лӱмеш педагогический институтым, тыгак РСФСР просвещений министерствын национальный школжо-влакын научно-шымлыше институтшым тунем пытарен.
Икымше произведенийже-влак 1940 ийыште «Ямде лий» ден «Ленин ой» газетлаште савыкталтыныт. 1954 ийыште «Пиалан жап» икымше почеламут сборникше лектын. Василий Сапаев – 15 книган авторжо. Эн палыме произведенийже-влак коклаште – «Мӧр пеледме годым», «Мом каласет, Миля?», «Йолташет уло гын» повесть-влак, «Кӱдырчан йӱр годым» роман да тулеч молат.
Писательын ӱмыржӧ 1990 ий 27 июльышто кӱрылтын.
У Торъял район Немда школышто В.Ф.Сапаевын педагогике да усталык пашажлан пӧлеклалтше зал уло. 2013 ийыште уста еҥлан школышто чап оҥам почмо.