8 июльышто, Еш, йӧратымаш да икте-весылан ӱшанле улмо кечын, рӱдоласе Патриарший площадьыште «Идалыкын ешыже» Российысе конкурсын регионысо этапыштыже сеҥыше-влакым саламленыт. «Самырык еш» номинацийыште Йошкар-Ола гыч Михайловмытым палемденыт.
Интернет палымым ыштен
Волжский район Сотнур селан эргыже Денис ден Морко район Кокласолаште шочшо Татьяна 2015 ий октябрьыште ешым чумыреныт. Татьяна Республиканский йоча эмлымверыште – врач-анестезиолог, Денис Йошкар-Оласе ик заводышто тырша. Ешыште кок эрге кушкеш.
Кузе палыме лийында манын йодмемлан Татьяна тыгерак каласкалыш:
– Йолташ ӱдырем соцкылысе лаштыкышкем кок рвезын фотожым колтен да кудыжо келша манын вашешташ йодын. Иктыже Денисын фотожо лийын, а мый йолташ ӱдыремлан вес фотожо сӧралрак манын вашештенам. Да Денисын фотожлан «шӱм» значокым темдалынам. Икмыняр жап гыч Денис соцкылысе йолташем-влак радамыш ушнен да тыге ваш возкалаш тӱҥалынна.
Татьяна тунам Угарман оласе кугыжаныш медакадемийын (кызыт ПИМУ) студенткыже лийын, а Денис Йошкар-Олаште МарГУ-што тунемын. 2013 ий майыште каныш кечылан Татьяна мӧҥгыжӧ толын. Тунам ӱдыр ден рвезе икымше гана вашлийыныт – Денис Кокласолаш лӱмын кудал миен. «Пеш солидный рвезе» манын шоналтен ӱдыр, Денисым икымше гана ужмекыже. Рвезе классический тувырым да брюкым чиен улмаш.
Ик идалык гыч Татьяна качыжым армийыш ужатен. А вес ийынже, 8 июльышто, Озаҥ оласе вокзалыште Денисым вашлийын. Тудо ийынак шыжым сӱаным ыштеныт.
Кандаш ий – ик тат гай
Тений ешышт шочмылан кандаш ият лиеш. Михайловмытын Иван эргышт шым ийыш тошкалын, тений икымше классыш кая. Ныл ийым эрталтыше Всеволод йочасадыш коштеш. Кызыт эрге-влакын каникул, кеҥеж пагытым коча-ковашт дене ялыште эртарат. Раисия Ивановна уныкаже-влакым тутло когыльо дене сийлаш йӧрата, а Николай Александровичын тракторышто пургедмыж годым рвезе-влак тудлан уло кумылын полшат.
– Мо оҥайже, – манеш Татьяна, – Иван сынже дене мыйын гай коеш, но койыш-шоктышыжо чылт ачажын: тыматле, ласка. А Всеволод сынже дене ачаж гай, но койышыж дене мыйым ушештара: южгунам тӱтан гай. Икшыве-влакым воспитатлыме шотышто ешыштына Денис – поро полицейский, а мый – осалже. Пелашем икшыве-влакым нигунам ок вурсо, йӱкым кугемдыде, чылажымат шот дене умылтара. Мыйын гын тидлан южгунам чытышем ок сите, эрге-влакым вурсенат налын кертам, нунын деч пеҥгыдын йодам.
Иван ден Всеволод кызыт утларакшым ӱстембал модыш-влак дене модыт. «Кладым кычал му» модыш нунылан пеш келша. Авашт иктаж-мом шылта, вара нуно, записке-шамычым лудын, «кладым» кычал мушаш улыт. Тиде модыш дене ялыште модаш йӧнанрак.
Пелашем – эҥертышем
Эмлымверыште Татьяна 2014 ий годсек пашам ышта. Пашаверыште сутка лийман. Каныш кече эре ик семын ок логал, график чӱчкыдын вашталтеш. Садлан вате-марий, икшыве-влак дене шогаш манын, шке паша графикыштым келыштараш тыршат.
– Пелашемлан кугу таум каласынем. Икымше икшыве шочмеке, пел ий гычак пашаш лектым, Ваня дене тудо шинчен. Смесьым пукшен, чиктен, малаш пыштен. Эргына-влакым ончен куштымаште ача семын Денисын надырже моткоч кугу. Пеҥгыде лияш, шке почеш вургемым але арверым верышкыже поген опташ да молыланат туныкта. Пырля шахмат дене модыт, мемнан йоча годсо йомак але мультфильм-шамычым ончат.
Денисын аважланат эре тауштем. Ондакак пелаш деч посна кодын, Таисия Иосифовна кум эргым йолӱмбак шогалтен. Кум шочшыжат уда койыш деч посна, шотан кушкыныт, кӱшыл шинчымашым налыныт. Жап лийме годым Сотнурыш миен толаш тыршена, телефон дене чӱчкыдын йыҥгыртен кутырена. Таисия Иосифовна ятыр ий эмлымверыште медшӱжарлан пашам ыштен. Эше келшымына годым Денис деч ончыкылык пелашем медпашаеҥ лиеш манмыжым ик гана веле огыл колынам. Ойлымыжо шукталтын, – шыргыжал каласкала Т.Михайлова.
Еш – икымше верыште
Паша ятыр вийым налеш гынат, еш дене пырля лияш жапым муашак тыршат. Вӱд воктеке каналташ каят, зоопаркыш миен толыт, родо-тукым дене унала лийыт. Денис ден Татьяна шке шижмаш нерген ваш-ваш палдарыме нергенат огыт мондо – шочмо кечылан але вес пайремлан пӧлекым кучыктат да чон гыч лекше поро шомакым каласат. «Южгунам иктаж пайрем кечын пелашемын йӱд сменыже логалеш. Тыгай годым эрдене пашаш кайымем деч ончыч тудлан поро тыланымашым кагазеш сералтем да холодильникыш магнит дене пижыктен кодем. Тиде икте-весе коклаште кылым эшеат пеҥгыдемда, шонем», – манеш самырык пелаш.
Татьяна кочкаш шолташ йӧрата. Денисын ик эн жаплыме кочкышыжо – ананас дене французла ямдылыме шыл. Йоча-влак гын кугыжан когыльым (королевский пирог) кӱэшташ чӱчкыдын йодыт.
– Реанимацийыште пашам ышташ куштылго огыл. Кунам эмлымверыште шке икшывет таҥаш ӱдыр-рвезе-влакым эмлет, чонлан поснак неле. Врач улам гынат, шке икшыве черланыме годым пеш тургыжланем, тыгай годым вуйуш врач семын огыл, ава семын пашам ышта, – манеш ава.
Паша деч вуйушым кандараш манын, яра жапыште Татьяна крючок ден шӱртым кучен шинчеш, мотор курчак-влакым пидеш. Мотор тувыран модыш-шамычым Т.Михайлова лишыл еҥ-влаклан пӧлекла, пырля пашам ыштыше-шамыч икшывыштлан пидын пуаш йодыт. Тиде кидпашалан кокымшо икшыве дене декретыште шинчымыж годым шӱмаҥын. А Иван шочмеке, самырык ава тӱрлӧ тӱсан фиалке-влакым окна ончылно куштен, шкешотан коллекцийым чумырен. Но икмыняр жап гыч тиде сомыл деч йӱкшен.
– Пиалан улат мо манын йодмылан шуко шоныде вашештем: «Пиалан улам». Кунам лишыл еҥет-влак, родо-тукымет таза улыт, ешыште йӧратымаш, ваш умылымаш, пагалымаш озаланат – лач тидым пиаллан шотлем. Да тыгай пиалым кажне ешлан тыланем, – манеш Татьяна.
Икте-весым пагалыше, поро кумылан Михайловмыт ешлан тений гына огыл, кажне ийын «Идалыкын ешыже» лӱмым нумалаш тыланыме шуэш. А тиде лӱмым сулаш, нунын каласымышт почеш, нимогай секрет уке: ваш йӧратен, пиалан икшыве-влакым куштыман.
Еш альбом гыч налме фото.