Самырык пагыт — мемнан,
Самырык ме улына.
Ме кугешнен ойлена:
Ме марий улына.
Ты корнылам Марий самырык тукым слётын участникше-влак мурат. Тиде нунын шкешотан гимнышт. Тений слёт марий ӱдыр-рвезе-шамычым Курыкмарий район Микрӓк селаште порын вашлийын. Тушко мыят миенам!
Слётыш Одо, Татарстан, Свердловск, Киров кундемла да Марий Эл гыч 18-35 ияш 80 уста еҥ толын. Студент да пашам ыштыше, мурызо, гармоньчо, сӱретче, туныктышо, клуб пашаеҥ, журналист вич кечылан ик ешыш савырненыт. Эн самырык участниклан – 14 ий, эн кугулан – 35 ий.
Кажне слёт ойыртемалтше
Латкудымшо гана эртаралтше Марий самырык тукым слётын ойыртемже могай? Программым ямдылыме годым тӱҥ шотышто кугу тӱткыш молан ойыралтын? Тушко мом ум пуртымо? Нине йодышлан Оньыжа Эдуард Александров тыгерак вашештыш:
– Кажне слёт ойыртемалтеш. Тений тудо Еш идалыклан пӧлеклалтын. Сандене тунеммаште, секцийлаште ме ача-ава да икшыве кокласе кыл, ешым чумырымо нерген шуко мутланенна.
Поснак кугу тӱткыш марий йылмылан ойыралтеш. Слётыш марий йылмым начарын палыше але йӧршеш палыдыме ӱдыр-рвезе-влакат ушнат. Нуно шочмо йылмым вияҥдаш, марий йылме дене кутыраш тунемаш толыт. Тидыже моткоч куандара. Тиде амал дене кажне кечын ме марий йылме дене физзарядкым эртарена, тудо марла кутыраш вожылшо еҥ-влаклан тургыжланымыштым, йоҥылыш каласаш лӱдмыштым кораҥдаш полша.
Тений курыкмарий ӱдыр-рвезе-шамыч олыкмарий йылмым тунемаш кумылаҥыныт да мӧҥгешла. Тиде мемнам ӧрыктарен да куандарен. Тыге нуно кок йылме секцийыште шуаралтыт.
Ныл лужа
Слётын участникше-влакым ныл лужалан шелме. Кажне лужан – шке лужавуйжо. Лужа кӧргыштӧ участник-влак мом ыштат? Кечышт кузерак эрта? Икымше лужан лужавуйжо Максим Алгайкин тыге каласкалыш:
– Ты слётышто мый кум гана участник семын лийынам. Тений лужавуй сомылым шуктем. Ӱдыр-рвезе-влак дене пашам ышташ мыланем моткоч келша. Ме вашке кылым ыштенна, тунеммашыш пырля коштына, тӱрлӧ темылан мутланена, эр гыч кас марте мурен-куштена. Кечына веселан да пайдалын эртыже манын, организатор-влак сай программым ямдыленыт.
Тыгак кажне лужалан ныл сомыл: блогер, затейник, организатор, кочмыверыште полышкалыше – пуалтын. Блогер-влак фотом, видеом войзат, соцкылыш вераҥдат, затейник-влак эр гыч кас марте яра жапым веселан эртараш тӱрлӧ модышым, куштымашым эртарат, организатор-влак тӱҥ организатор-шамычлан полышкалат, эр зарядкым ыштыктат, кочмыверыште кочкышым оптен да пуэден шогат.
Слёт кайыме жапыште тӱрлӧ студийыште ешартыш шинчымашым погаш йӧн лийын. Самырык-влак слётын икымше кечыштыжак шкаланышт келшыше ик студийым ойырен налыныт да кум кече почела тушко коштыныт. «Еш» студийым психологий шанче кандидат Н.Г.Айварова вӱден. Тушто еш кокласе кыллан кугу тӱткыш ойыралтын. «Социальный проектирований» студийыште Н.В.Давыдова проект-влакым возаш, задаче ден цельым чын шындаш, логикым муаш туныктен. «Тукымвож» секцийыште историй ден тӱвыра шарныктышым аралыме да кучылтмо шотышто шанче-производство рӱдерын тӱҥ специалистше Н.В.Конышева тукым вожым чын ышташ шинчымашым пуэн.
«Марий йылме» секций кок подсекцийлан шелалтын. Олыкмарий йылмым Марий Эл Радион пашаеҥже И.Л.Петрова вӱден гын, курыкмарийым – марий йылмым туныктышо Т.В.Вилюкова. «Марий йылме» секцийын участникше-влак инсценировкым шынденыт.
Пытартыш кечын концерт лийын. Тушто кажне лужа ик номерым ончыктен. Тыгак шке кумылын але район гыч толшо делегаций-влак посна муро-куштымашым ончыктен кертыныт.
Участник-влак «Марий калык историй» квизыште шинчымашыштым тергеныт. Ты квизым историй шанче кандидат С.К.Свечников эртарен да тиде теме дене лекцийым лудын.
Тыгак Курыкмарий район да Ардембал ялыш экскурсий дене миен коштыныт. Палыме еҥ-влак дене мутланашышт йӧн лийын. Спорт таҥасымаште чолгалыкыштым, ӱнарыштым терген кертыныт.
Мастарлыкыштым шуареныт
Самырык тукымлан «Мый чыла ыштен моштем» калык кидпаша мастарлык школ эртаралтын. Ты школышто 8 мастер-класс лийын: портышкемым йӧрымаш, лапчык гыч курчакым ыштымаш, тасма дене тӱрлымаш, тыглай тӱрлымаш, суксым ыштымаш, кӱслем шоктымаш, марий орнаментан брошкым да аралтышым ыштымаш.
Слётын эн чолга, уста, шке калыкше верч тыршыше участник вес гана ты мероприятийыш организатор-влак коклаш логалын кертеш. Тыгак нунылан вес тӱрлӧ форумыш, слётыш каяш йӧн лектеш.
Анна Лукина, Одо кундемысе марий самырык-влакын «Ӱжара» ушемын еҥже. Тудо Башкирыште шочын-кушкын. Ты слётыш икымше гана толын.
– Калык келшымаш пӧртыштӧ самырык еҥ-влак дене пашам ыштем. Ты слётыш Одо кундем гыч кумытын толынна. Слётышто йокрокланаш жап уке, тӱрлӧ мероприятий лийын. Мый марла начарын кутырем, а тыште кажне яра жапыште марий муро йоҥга, участник-влак шке коклаштышт эре марла мутланат, нуным ончен да колыштын вич кечыште марла кутыраш, у мутым пален налаш сай йӧн лийын. Мый «Еш» секцийыш коштынам, мыланем тиде теме оҥайын чучын, ятыр йодышлан вашмутым муынам, – мане Анна.