Сад-пакчазе-влак коклаште тӱрлӧ тӱсан да тӱрлӧ форман мотор петунийым йӧратыдыме еҥже укеат, очыни. Тиде пеледышым йыраҥыште гына огыл, вазоныштат, тӱрлӧ контейнерыштат, эсогыл пачерысе окнаште кушташ лиеш.
Петуний пеледышым эн ондак Кечывалвел Америкыште шукияш кушкыл семын кушташ тӱҥалыныт. Элыштына тудым икияш семын росотам ыштен куштат
КУНАМ ӰДЫМАН?
Петунийым утларакше мартыште ӱдаш темлат. Тиде тылзыште росоталан сайын кушкаш кечын волгыдыжо утларак логалеш. Нӧшмым ондак ӱдаш гын, кушкыл моткоч лывыжге, вийым налын шуктыдымо лиеш. Тыгай росота эркын кушкеш, тӱрлӧ чер ваштареш кучедал огеш сеҥе. Варажымат пеледыш моторлыкшо дене тичмашнек куандарен огеш керт. Телым ӱдымӧ петунийым кастене электротул дене волгалтарыман.
КУЗЕ ӰДЫМАН?
Пытартыш жапыште сад-пакчазе-влак нӧшмым ӱдаш торф таблетке-влакым кучылтыт. Петунийым тыгай йӧн дене ӱдаш поснак келшен толеш. Эн ончыч таблетке-влакым иктаж атыш пыштыза, вӱдым ешарыза. Вӱд дене лӧчен кугеммекыже, тушко нӧшмым иктын-иктын пыштыза. Атым янда але плёнко дене петырыза. Жапын-жапын атым почса да вӱдым ешарыза.
Таблеткылаш ӱдаш йӧн уке гын, кеч-могай атым кучылт кертыда. Тушко рокым оптен вӱдыжтарыза. Вара ӱмбакыже нӧшмым пыштыза, парня дене изиш пызыралза, но ӱмбач рокым ида опто. Атым тыгак янда але плёнко дене петырыза.
МО ДЕНЕ ӰЯҤДЫМАН?
Росота таза да мотор лийже манын, жапыштыже вӱдыжтарыман. Атыште рок кошка гын, росота кола. Но вӱд утларак лиеш гын, кушкыл черлана да шемемеш.
Нӧшмым ӱдымеке, вӱдым лейке дене ида шаве, ӱмбачын пульверизатор дене вӱдым шыжыктен вӱдыжтарыза.
Петунийым посна шындымеке (пикироватлымеке), 14 кече гыч икымше гана ӱяҥдышым пуаш лиеш. Тудым эн ондак лышташышке шыжыктыман. Писынрак кушкаш полшышо минеральный удобренийым азотан ӱяҥдыш дене алмаштыман. Вара ӱяҥдышым вожышкат шаваш лиеш.
ТӰРЛӦ СОРТ
Петуний тӱрлӧ сортан лиеш. Икмынярже дене палдарена:
Ампельный. 50-150 сантиметран кушкыл писын да одарланен кушкеш. Сакалтыме кашпошто пеледыш кечалтеш да поснак моторын коеш. Игечым ончыде, тудо шуко жап пеледеш. Но тале мардеж да йӱр тудым локтыл кертеш. Сандене ампельный петунийым мардеж да йӱр логалдыме верыш шындыман.
Бахромчатый. Пеледышыже кудыр, гофрироватлыме да пӱчкылтшыла койшо лиеш.
Каскадный. Каскадный петунийын тӱҥжӧ кӱчык да кӱжгӧ, тудо кӱшкыла кушкеш да нелытше дене вара ӱлыкыла кечалтеш. Тыгай петунийым кашпошко да вазонлашке шындаш келшен толеш.
Кустовой. Вияш да кӱчык (20-25см) кушкыл. Южгунам кужуракат вашлиялтеш. Ӧрдыж гыч шукырак кушкыл лекше манын, тыгай петунийын вуйжым чывышталман.
Махровый. Тиде сорт шуко лышташан да моткоч мотор. Махровый петуний тале мардежым да йӱрым огеш чыте, моторлыкшым вигак йомдара, шапалга.
