Пенсийыш ончылгоч лекташ кӧн праваже уло?
И.Мамаева.
У Торъял район.
Российысе Социальный фондын Марий Эл Республикысе пӧлкаже умылтара:
– Пенсийыш кок ийлан ондакрак 37 ий паша стажан ӱдырамаш да 42 ий стажан пӧръеҥ-влак лектын кертыт. Тыгодым ӱдырамаш 55 ийым, а пӧръеҥ 60 ийым темышаш улыт.
Пенсийыш ончылгоч лекташ правам пуышо страховой стажыш пашам ыштыме тугай жап пура, кунам обязательный пенсионный страхованийлан страховой взнос тӱлалтын. Тыгак призыв почеш армийыште служитлыме жапым ончат.
Призыв почеш службым шотыш налын, пенсийыш ончылгоч каяш права 2022 ий 3 ноябрь марте лектын гын, пенсийым 2022 ий 24 февраль гыч палемдат. Тыгай права 2022 ий 3 ноябрь деч вара лектын гын, пенсийым йодмашым возымо кече гыч палемдат. Ушештарена: кӱлеш стаж деч посна пӧръеҥ 60 ийым темыше лийшаш, тыгак 25,8 деч шагал огыл индивидуальный пенсионный коэффициент (2023 ийыште) погынышаш.
Специальный военный операцийыште военный службым эртыме жап стажыш кок пачаш кугемдалтын шотлалтеш. Тыгаяк условий шукталтеш добровольческий формированийыште улмо жап шотышто.
Пенсийыш ончылгоч лекме годым йочан идалыкат пелаш лиймыж марте декретыште шинчыме да шоҥгыеҥым ончымо жап огыт пуро.
Паша стажым да пенсионный коэффициент мыняр улмым шке семын Госуслуго порталыште але Россий Социальный фондын сайтыштыже личный кабинетыште тергаш лиеш, тидлан индивидуальный лицевой счёт гыч выпискым заказатлыман.
Тений кундемыштына илыше 100 пӧръеҥлан да 13 ӱдырамашлан пенсийым ончылгоч палемдыме.