Йошкар-Оласе 19-ше номеран школысо Росгвардийын 8 «Б» классыштыже тунемше кадет-влак Моско олаште эртаралтше военно-патриотический мероприятийыш миен коштыныт.
Кадет-шамыч Александровский садыште Палыдыме салтакын шӱгар ӱмбакыже венок ден пеледышым пыштеныт. Мероприятий Шнуй А.Невский князьын мощьшым Владимир гыч Санкт-Петербургыш кусарымылан 300 ий теммылан пӧлеклалтын. Тыгак кадет-влак Россий Армийысе А.В.Александров лӱмеш академический ансамбльын концертшым онченыт, Поклонный курыкышто верланыше «Г.О.Р.А» тоштерыште лийыныт. Тыгай мероприятийыш ушнымаш тунемше-шамычын элнан историйжым пален налме шотышто шинчымашыштым келгемдаш да кугешнымашым шочыкташ полша.
