Кок пачашан пӧртым пел ийыште чоҥен шукташ лиеш мо? Лиеш. Тидым В.А.Кутузов шке примерже
дене пеҥгыдемда.
Тений тудо Оршанке район Тошто Крешын ялыште шке илыме верым чоҥаш тӱҥалын, кызыт пӧрт ямде, манаш лиеш. Кӧргыштӧ ыштышаш сомыл-влак гына кодыныт.
Василий Аркадьевич чоҥымо пашам шукта, Москош да моло кундемыш кудалыштеш. Шке пӧртым чоҥаш шукертак шонен коштын. Шийвундым поген да шошым пашалан пижын. Тудлан йолташыже-влак полшеныт.
– Киров кундем гыч улам. Икмыняр ий ончыч ача-авам дене Оршанке район Кӧрдӧ ялыште пӧртым налынна да тушко илаш кусненна. Татьяна пелашем – Тошто Крешын гыч. Пӧртнам тудын шочмо суртшо воктене нӧлтенна. Проектым шке ямдыленам.
Оралтым СИП-панель гыч чоҥымо, тыгай материалым утларакшым Моско кундемыште пӧрт-влакым чоҥымаште кучылтыт. Марий Элыште СИП-панель гыч пӧртым чоҥымо паша эше вияҥеш гына. Тыгай оралте-влак шокшым сайын кучат, чоҥымо пашат вашке шукталтеш, – каласкала В.Кутузов.
Василийын Татьяна пелашыже Тошто Крешыныште кевытыште пашам ышта. Пӧръеҥ ончыкылык пелашыж дене туштак палыме лийын: сатулан толын, ужын, Татьяна чонжым савырен. Ешыште ныл икшыве кушкеш.
Мийымына годым Василий Аркадьевич вургемым мушмо машинам вераҥда ыле. Тудо пӧртыштыжӧ изирак экскурсийым эртарыш. Икымше пачашыште зал, кухньо, санузел, арверым аралаш вер, Татьянан аважлан посна пӧлем лийыт. Кокымшо пачашыште эше ныл пӧлемлан, гардероблан да санузеллан верым ойырымо. Пӧрт чынжымак пеш шокшо.
Моло самырык еш семын Кутузовмыт олаш илаш ынешт кусно. Нунылан ялысе илыш утларак келша: яндар юж, шке пакча, икшыве-влак уремыште ласкан модын коштыт.
Татьяна Аркадьевна ден Василий Аркадьевич, у пӧртыштӧ илышда эшеат пиалан да ласка лийже.
Авторын фотожо-влак.