«Пасуш да олыкыш тӱтыра возын»

Марий Элын сулло сӱретчыже да 1990 ий годсек Российысе художник ушемын еҥже Геннадий Зыковын тыгай лӱман радынажым Т.Евсеев лӱмеш Национальный тоштерыште республикнан 100 ияш лӱмгечыжлан пӧлеклалтше ончерышке лукмо ыле.

Оршанке районысо Изи Каракша ялыште шочын-кушшо Геннадий Владимировичын илышыже тӱрлӧ шӧрынан лийын. Тений 1 февральыште тудо 83 ийым темыш. Тудо шукертак Йошкар-Олаште ила гынат, шочмо кундемыште эртарыме пиалан пагытлажым порын шарналташ йӧрата, илыш корныш шогалаш полшышо туныктышо-влакым лӱмышт денак шарна.

Мастарлыкше – коча-коваж деч

Йочан кумылжым шукыж годым коча-коваже налын моштат да тӱрлӧ сомыллан туныктат. Геннадий денат тыгак лийын. Коваже ялыштат уста тӱрлызӧ улмаш. Каналташ шичмекше, кӱсле дене шоктен, пошкудо-влакым куандарен. Кочаже шӧртньӧ кидан мастар улмыж дене чапланен. Мӧҥгыштышт тошто пу ӱзгар дене пайдаланеныт. Тидым рвезе ужын кушкын. Нунын моторлыкыштым Гена ий еда утыр эскераш тӱҥалын.

Но Г.Зыков сымыктыш тӱняшке вигак логалын огыл. Совет жапысе еҥ семынак обществылан пайдале сомылым шукташ да тичмашнек кӱлешан еҥыш савырнаш шонен, чоҥышо профессийлан кумылаҥын. Тудым СССР-ысе трудовой резерв управленийже Коми АССР-ышке колта. Тушто Г.Зыков Печора оласе 10-шо №-ан строительный школышто тунемеш да каменщик профессийым налеш. Марий рвезылан Лев Давидович Эпштейн педагог да ача семынак чучын.

УМБАКЫЖЕ — 21 апрельыште лекше «Кугарня» газетыште лудса.

Библиотекарь В.А.Акилбаева дене пырля.