Пашам муынат – шижтаре

Мый пашадымылык шотышто пособийым налам. Южгунам гражданско-правовой договор почеш пашам ыштем. Тиде законым пудыртымылан шотлалтеш мо?
Игорь.
Килемар район.

Килемар районын прокуратуржо умылтара:
– Айдеме пашам ыштышылан шотлалтеш гын, тудо пашадыме семын учёт гыч кораҥдалтеш, да пособийымат тӱлымым чарнат. Тидын нерген «О занятости населения в Российской Федерации» законын (1991 ий 19 апрельыште лукмо) 35-ше статьяжын 2-шо пунктыштыжо ойлалтеш.
Ты законын 2-шо статьяж дене келшышын, пашам ыштышылан паша договор почеш тыршыше-влак шотлалтыт, тидын шотыштак иктаж вознагражденийлан тичмаш але тичмаш огыл паша кечым ыштыше-влакат. Сезонлык, ик жаплан лийше, тыгак гражданско-правовой, авторский договор-влак почеш ыштымат, производственный кооператив (артель)-влакын членышт улмат пашам ыштымылан шотлалтыт.
Пашадымылык шотышто пособийым налше еҥ пашам ыштымыж нерген пашам темлыше службыш огеш шижтаре гын, тудлан РФ Уголовный кодексын 159.2 статьяжын 1-ше ужашыж почеш мут кучаш логалеш. Тидыже выплатым налме годым мошенничествылан шотлалтеш, вес семынже пособийым, компенсацийым, субсидийым да моло социальный выплатым налме годым, шоя да (але) чын огыл сведенийым каласен, тыгак нине выплате-влакым тӱлаш чарыше фактым шылтен, оксам але вес погым шолыштмаш лиеш.
Ты статья почеш тыгай наказаний-влак лийын кертыт:
 120 тӱжем теҥге марте штрафым але ик идалыкысе наре пашадар але моло доход кугыт штрафым пуат,
 360 наре шагат обязательный пашам ыштыктат,
 ик идалык марте исправительный пашам ыштыктат,
 кок ий марте эрык деч посна кодат,
 кок идалык марте ӧкымеш пашам ыштыктат,
 ныл тылзе марте жаплан арестоватлен кертыт.