Паша уке – пашадарат уке

Тӱняште коронавирус инфекций шарлымылан кӧра шуко еҥ паша деч посна кодын. Мӧҥгыштӧ шинчыме жапыште паша верыште оксам тугак тӱлат гын, илен лекташ лиеш. А уке гын?

Самырык-влак тиде неле пагытым кузе илен лекташ шонат?

 

Владимир  Ч., Йошкар-Ола:

– Мый активно каныме рӱдерыште пашам ыштем.  Тушто официально ом шотлалт.  Мӧҥгыштӧ паша деч посна шинчымемлан тылзат шуэш. Тиде жапыште мыланем пашадарым тӱлен огытыл. Умбакыжат карантин пытымешке тӱлаш огыт тӱҥал. Мом ышташ, кызытеш ом пале. Иктаж вес пашаш жаплан каяш шонымаш лийын, но кушто кызыт пашам муаш? Ала пилорамылаш каен ончаш?..

Екатерина Э., Советский район:

– Мый Йошкар-Олаште шӧртньӧ ден ший сӧрастарыш-влакым ужалыме кевытыште пашам ыштем. Пашам ыштыдыме арням увертарымеке, мыланна ик тылзылан шке кумылын канаш каяш йодмашым возаш кӱштеныт. Тунам ме март тылзылан пашадарымат налын шуктен огынал. А вара апрельлан компенсацийым тӱлаш тӱҥалыт манын каласышт, тыгодым компенсацийлан оксам мемнан пашадар гычак налыт. Йошкар-Олаште пачерым айлем, вашке тудланат тӱлыман. Икманаш, неле пагыт шуын. Кызыт мый ялыште ача-авам дене илем, сурт сомылкам ышташ полшем.

Светлана Т., Йошкар-Ола:

– Мыйын паша верыште пашадарым огыт тӱлӧ, кузе шонеда, туге илыза манме гай. Пелашемлан тӱлат, сандене вес паша нерген шонен омыл. Шуко йолташ ӱдыр-влак Интернетыште «удалённый» але кевытлаште пашам кычалыт. Кӧ официально пашам ыштен да паша деч посна кодын, нуно паша верым темлыше рӱдерыш  учётыш шогалыт, тыге кеч иктаж теҥгем кугыжаныш деч налын кертыт.

Анна И., Медведево посёлко:

– Мый моторлык салонышто пашам ыштенам. Кызыт клиент-влакым мӧҥгыштӧ приниматлем. Кӱлеш гын, ӱпымат тӱредам, кӱчымат шотыш кондем. Заказ шуко огыл, арняште кокыт-кумыт гына. Пелашемат паша деч посна кодын, а мемнан изи йочана уло, тудым пукшаш кӱлеш. Адакшым пачерым айлена. Тудланат тӱлыман.

Татьяна Н., Козьмодемьянск ола:
Аныклен моштет гын, илен лекташ лиеш. Рвезе-влаклан Интернетыште оксам ышташ кызыт йӧн шуко, кумыл гына лийже. Мыйын шке бизнесем уло, Интернет йӧн дене вургемым ужалем. Элыштына неле ситуаций гынат, пашам тугак ыштем, йодшо-влак улыт.