Панфиловец-влаклан

«Героям-панфиловцам» мемориал (официальный лӱмжӧ – «Подвигу 28») Моско областьысе Волоколамский район Дубосеково посёлко воктене верланен. Кугу Отечественный сарын геройжо-шамычлан пӧлеклалтше памятник-влак кокла гыч ик эн кугулан шотлалтеш. Комплексым 1975 ий 6 майыште Сеҥымашлан 30 ий темме лӱмеш торжественно почыныт.

1941 ийыште Моском немыч фашист-влак деч аралыме годым Казах ССР-ысе Алма-Аты да Киргиз ССР-ысе Фрунзе олалаште формироватлыме 316-шо стрелковый дивизийын военнослужащийже-влакат шогеныт. Нуным генерал-майор И.В.Панфилов вуйлатен. 1941 ий 16-18 ноябрьыште дивизийым тушманын пехотыж ден танкше-влак атаковатленыт. Нине кечылаште дивизий Дубосеково кундемыште Шочмо эл верч лӱдде шоген.

Кредалмашын 28 участникшылан (колымекышт) Совет Ушем Герой лӱмым пуымо.

«Героям-панфиловцам» памятникын скульптурный группыш 10 метр кӱкшытан куд айдеме фигур пура. Группым кум посна скульптурлан шелыныт: «Вперёдсмотрящий», «К бою готовы» да «Клятва на верность Родине». Нуно Нелидово ялыш корно воктенысе кӱкшака верыште шогат. Салтак-влак касвелыш, пасу могырыш, «ончат» – тушеч 1941 ийыште немыч танк-влак толыныт. Памятник-влак ончыко бетон плита-влакым вераҥдыме, нунышт пытартыш оборонительный рубежым ончыктат. Тудын ик мучаштыже – 1941 ийысе событий-влак дене палдарыше гранит плита.