«Российын ечыгорныжо – 2024» тӱшка таҥасымаш Россий Президент В.Путинын темлыме «Демографий» нацпроектын «Спорт норма жизни» федеральный проектше почеш эртаралтеш. Тӱҥ старт 10 февральыште «Корта» ече базыште пуалтын. Тыгак икмыняр районлаште старт-влак лийыныт. Ечыгорныш спортым йӧратыше ятыр еҥ кажне ийын шогалеш. Тушко еш, коллектив дене тыгак тӱрлӧ аланыште чапланыше-влакат шукын ушнат.
Еш дене пырля
Тений икымше гана еш-влаклан старт лийын. Тушко Российысе #всейсемьёй акций почеш республикысе 45 еш ушнен. Тыге ачалан але авалан икшыве дене пырля ик меҥгым куржаш кӱлын. Кеч тушто сеҥыше-влакым палемден огытыл гынат, финишыш Параньга район Кугу Пумарий ял гыч Веселовмыт еш икымше толыныт. Вероника Ивановна верысе школым вуйлата, тыгак физкультурым да тӱҥалтыш класслам туныкта. Тудын Софья ӱдыржӧ кумшо классыш коштеш. Спорт дене пеҥгыде кылым куча. Варажым ава ден ӱдыр тӱшка стартыште вийыштым тергеныт. Вероника Ивановна лу меҥгыш, Софья вич меҥгыш куржыныт.
Кумылым нӧлта
«Виктория» спортшколын директоржо Александр Владимирович Захаров денат мутнам вашталтышна. Тудо тыгерак мане:
– Ече дене Российысе тӱшка таҥасымашын тӱҥ стартше «Корта» ече базыште пуалтеш гын, районлаштат мероприятий-влак эртат. Тидыжым еҥ-влаклан куржашышт йӧнанрак лийже манын келыштарыме. Вет уке гын тыште лу тӱжем наре еҥлан куржман ыле. Тений, мутлан, тӱҥ стартыш ушнаш тӱжем утла еҥ регистрацийым эртен. Районлаште мыняр еҥын ушнымыжым шотыш налын, республикысе статистикым пеҥгыдемдена. Кажне ийын «Российын ечыгорныжо» таҥасымаш тӱрлӧ ийготан, профессионал да йӧратыше, тӱҥжӧ – кумылан-влакым чумыра. А тидыже мыланна – эн тӱҥжӧ. Тугеже мероприятийын кӱлешлыкше уло.
– Марий Элысе профобъединений-влакын председательже Александр Иванович Майоров тыгерак палемдыш:
– Ты таҥасымаш еш пайремыш шукертак савырнен. Тушко тӱрлӧ ийготан участник-влак ушнат. Кажне ийын йӱла почеш февральыште спортым йӧратыше, таза илыш-йӱлам кучышо, ече дене кошташ йӧратыше-шамыч погынат. Тидыже элыштына илыше-влакын спорт дене кылым да таза илыш-йӱлам кучымышт, тазалыклан утларак тӱткышым ойырымышт нерген ойла. Тидыже куандара да кумылым нӧлта. Стартыш кажне ийын шукырак да шукырак еҥ ушна, тӱҥжӧ – тыште поро да весела шӱлыш озалана.
Илашат куштылгырак
Советский районысо «У илыш» озанлыкын чолга пашаеҥже-влак пайремыш ятырын толыныт ыле. Ты кечын нунынат кундемыштышт мероприятий эртаралтын, но нуно тӱҥ стартыш толаш шукертак шоненыт. Озанлыкым вуйлатыше Надежда Ивановна Богачук тидын нерген тыге каласкалыш:
– Тыште озанлыкыште тыршыше тӱрлӧ специалист улыт. Чылаже индешын толынна. Икте, мутлан, ушкалым лӱшта, весе презым пукша, кумшо – механизатор, водитель але иктаж-могай вес сомылым шукта. Ме тыгай таҥасымаште икымше гана улына, ечымат лӱмын налынна. Паша – паша дене, коллектив денат жапым сайын да пайдалын эртарыман, а «Российын ечыгорныжо» таҥасымаш лачеш келшен толын. Тыште икте-весе дене вашлияш, пайрем кумылым шижаш, капкылым тарватылаш, яндар южышто кошташ моткоч сай йӧн. Тыгай мероприятий-влак коллективымат вияҥдаш полшат. Икте-весылан шыргыжалын, сай кумылым пӧлеклена. Тыге илашат куштылгырак!
Владимир Казанцев спорт ориентирований да туризм дене профессионально заниматла. Спортын ты видше дене Марий Элын сборный командын ик еҥже. Ече дене коштмашымат сайлан шотла. Тудын ойлымыж почеш, ик спорт весым кумдаҥдаш полша. Владимир «Российын ечыгорныжо» тӱшка стартыш кажне ийын ушнаш тырша. Тидын дене тудо шканже шкешотан иктешлымашым ышта да моло ийласе результатше-влакым саемдаш тырша.
Тӱҥ стартыште чылаже тӱжем наре еҥ куржын. Эн изи участниклан кум ий, эн илалшылан 86 ий лийын. Кажне участниклан Российысе Олимпийский комитет деч пӧлекым да дипломым кучыктеныт.
Ты кечын «Корта» ече базыште, чынжымак, пайрем шӱлыш озаланен. Сылне муро, артист да аниматор-влак пайрем кумылым нӧлтеныт. А чевер кечын чолгыжмыжым чыла гаяк участник палемден. Икманаш, пайрем кумылан таҥасымаш икте-весын чоныштышт эше ятыр жап илаш тӱҥалеш.
И. Речкинын фотожо-влак.