2021 ийын икымше кварталыштыже эртыше квартал дене таҥастарымаште Марий Элыште у пӧртыштӧ ик квадрат метр илыме вер 1,8 процентлан шергештын, тоштырак пӧртлаште – 1,3 процентлан. Тыге 46415 да 40741 теҥгешке шуын.
У пӧртлаште саемдыме качестван пачерлан ак 2,1 процентлан ешаралтын, кокла качестванлан (типовой) – 1 процентлан.
Тоштырак пӧртлаште кокла качестван (типовой) пачер 1,5 процентлан шергештын, саемдыме – 1,3 процентлан, ударак качестван – 0,4 процентлан.
2021 ийын икымше кварталыштыже Юл кундем округысо регион-влак коклаште ик квадратный метр илыме верын эн изи акше (у пачерыште – 42215 теҥге, тошто пачерыште – 39392 теҥге) Оренбург областьыште лийын. Марий Эл у пӧртысӧ эн изи ак шотышто нылымше верыште кая, тоштырак пӧрт дене – 2-шо верыште. Пачер ак Татарстаныште эн шерге (88227 да 87576 теҥге).