«Олаште илымем огеш шу, ялым, пÿртÿсым йöратем», – манеш экологий кружокын туныктышыжо Екатерина Березина. Тудо Шернур район Пÿнчерйымал ялыште шочын-кушкын. Икымше ден кокымшо класслам Нольыкмарий школышто тунемын, вара Шернур посёлкысо 1-ше №-ан школыш куснен. Тушто 11-ше класс марте шинчымашым поген.
– Изинек книга-влакым лаштыклаш йöратем. Икана кресавам шочмо кечемлан 500 теҥгем пöлеклен. Авам тиде окса дене кÿжгӧ энциклопедийым налын. Тиде книгам мый сайын ончен лектынам, шымленам. Пÿртÿс дене кылдалтше материал-влак поснак келшеныт. Школышто биологий ден географий предметлам йöратен тунемынам. Тыгодым марий йылме ден литературат келшеныт, – каласкалаш тÿҥале ÿдыр.
Биологий, географий, марий йылме, литератур да моло предметла дене Катя шинчымашыжым районысо да республикысе олимпиадылаште терген, сеҥыше-влак радамыш чӱчкыдын логалын. Тылеч посна чонлан келшыше пашамат ыштен шуктен. Мутлан, футбол, батминтон дене модын, фотографийым ыштеден. Тыгак тÿҥалтыш класслаште Шернур посёлкысо йоча усталык пöрт пеленысе «Ший памаш» ансамбльыш мурашкушташ да крючок дене пидаш тунемаш коштын.
– Ончыкылык профессийым ойыраш неле лийын?
– Шымше классыште тунеммем годым ачам ден авам пÿртÿс алан дене кылдалтше профессийым ойырем маныныт. Шонымашышт чыныш лектын. Школ деч вара ПГТУ-шко «Институт леса и природопользования» направлений дене тунемаш пуренам.
– Студент пагыт гыч могай шарнымаш эн волгыдо?
– Эн сай шарнымаш практике дене кылдалтын. Эколог-влак практикым кеч-кушто эртен кертыт, сандене ме Моско областьысе Приокско-Террасный кугыжаныш пÿртÿс биосферный заповедникыште ик тылзым лийынна. Ик кечын Моско областьыште кугу мардеж озаланен, да загон-влак почылтыныт. Ик тыгай загон гыч зубр-влак лектыныт. А эрдене мемнан пöрт деч тораште огыл 12 зубрым ужынна. Нуно шудым кочкын коштыныт. Тиде кечым мый пиаланлан шотлем, вет ме нуным икымше гана ужынна.
– Кызыт кушто пашам ыштет?
– Кокымшо ий Шернур посёлкысо йоча усталык пöртыштö «Экологий» кружокышто занятийым вÿдем, пÿртӱсым аклаш, йӧраташ кумылаҥдем. Эше 2019 ий годсек икшыве-влакым пидаш туныктем.
Тыгак МарГУ-што «Филология» направлений дене ешартыш шинчымашым заочно налам. Туныктышо лиям манын, нигунам шонен омыл, но пÿрымаш чыла шке верышкыже шынден. Тунем пытарымек, шке шочмо верышкак толаш шонем. Олаште илымем огеш шу, ялым, пÿртÿсым йöратем. Кушто шочынам, туштак кÿлам, шонем.
– Кызыт чылан гаяк мöҥгыштӧ шинчат. Йоча-влак дене занятийым онлайн йöн дене эртарет?
– Тунемше-влаклан тÿрлö заданийым колтем, нуно ача-авашт дене пырля ыштат да пашаштым аклаш колтат.
– Яра жап годым мом ыштет?
– Спорт дене заниматлем, пушкыдо модыш-влакым пидам, йолташвлак дене походыш кошташ йöратем, индийский куштымашым тунемам. Тыгак пÿртÿс лоҥгаште жапым эртараш келша.
– Иктаж-мом вашталташ шонымаш уло?
– Кызытеш тыштак пашам ышташ шонем, а вара илыш ончыкта.
Еш альбом гыч налме фото.