Пӧръеҥ шке мутшылан оза лийшаш

Шочмо эллан служитлаш тудлан тыглай шомак огыл, тиде кажне кечын шуктымо порыс, илыш-йӱла. А профессийже эшеат ойыртемалтше, вет военный врачлан салтак шке тазалыкшым, илышыжымат ӱшана, манаш лиеш. Лаштыкнан унаже – III степенян Кутузов орденан Киево-Житомирский ракетный дивизийын 779-ше ракетный полкшын 69795 №-ан воинский частьысе (Медведево район Речной посёлко) медицинский пунктын начальникше, медицинский службын кугурак лейтенантше Виктор Васильев (фотошто — шолаште).

Медведево район Нужъялыште шочын-кушшо рвезе Йошкар-Оласе «Синяя птица» гимназийыште тунемын. Изиж годым тудо футболист лияш шонен. Кугурак класслаште биологий ден химий предмет-влак утларак келшеныт да Виктор гимназий деч вара медвузыш тунемаш каяш шонен. Но рвезын аваже тудым ты шонымаш деч шӧраш тыршен. Вет Татьяна Аркадьевна – шкежат фельдшер, садлан медицине пашам, врачын куштылго огыл профессийже нерген пеш сайын пала. А 11-ше классыште тунеммыж годым Викторлан туныктышыжо-влак Военно-медицинский академийыш тунемаш пураш темленыт. «Молан уке, врач лиям, да эше погонан», – шоналтен тунемше да ямдылалташ тӱҥалын. Физподготовкылан шуко жапым ойырен.

– Рвезылан армийыште служитлаш кӱлешак, шонем. А мый тидым академийыште тунеммем годым ыштенам. Тунемаш пураш неле лийын огыл: кӱлеш предмет дене баллым ситышын погенам, физподготовко сай ыле. Гимназийыште тунеммем годым икымше класс гычак интернатыште иленам, тидат мыланем шӱкалтыш лийын, очыни. Вет мый изинек самостоятельный лийын кушкынам. Садланак икымше курсыштат нелын чучын огыл.

Санкт-Петербургысо Киров лӱмеш военно-медицинский академийыште военный медицинылан специалист-влакым ямдылат. Тушто курсант-влакын воинский подготовкыштланат ик эн тӱҥ вер ойыралтеш. Куд ий тунеммеке, пеҥгыде дисциплинылан сайынак тунем шуынам, – каласкала В.Васильев.

Академий деч вара Виктор распределений почеш ончыч 93876 номеран частьыш логалын, а кызыт 69795 номеран частьыште нылымше ий службым эрта. Тудо военнослужащий-влаклан приёмым эртара. Военный врач дек шукыж годым ОРЗ, ОРВ черан еҥ-влак толыт, аппендицитымат палемдаш логалын.

Татьяна Аркадьевна шкежат частьыште медшӱжарлан пашам ышта. Садлан ава ден эрге шке профессийышт нерген южгунам кутырат, ава эргыж деч врач семын каҥашымат йодеш.

В.Васильевлан вуйушым кандараш музык полша. Паша кече деч вара, кеч 15 минутлан гынат, гитарым кидышкыже налеш. Йолташыж дене, жапын-жапын вашлийын, ты семӱзгар дене йӧратыме семым перкалат. Эше Виктор шахмат дене сайын модеш.

«Пӧръеҥ могай лийшаш?» – йодым В.Васильев деч. «Эн ончыч чын пӧръеҥ ответственный лийшаш. Мутым пуэн гын, нимом ончыде, тудым шуктышаш», – мане тудо.

Ойырен налме профессийжым Виктор Васильев йӧрата, пашаже тудлан чон ласкалыкым конда. Тидыже каласкалымыж гыч шижалтеш. Академийыште тунеммыж годым Виктор хирургийым йӧратен шынден. Садлан ончыкыжым хирурглан тунемаш пурынеже. Тидлан кызытак ямдылалтеш.

В.Васильевын альбомжо гыч налме фото.