Ий еда 27 сентябрьыште Российыште воспитатель-влакын кечышт палемдалтеш. Те ты кечым пайремледа мо?
Снежана Никитина, Медведево посёлко:
– Мый ынде ятыр ий воспитатель улам. Шочмын, 27 сентябрьыште, тиде пайремым шкенан Йошкар-Оласе 53-шо номеран «Изи патыр» йочасадын коллективше ден пайремлышна. Мемнан воспитанникна-влак педагог-шамычлан концертым ямдыленыт. Тушто муро, почеламут, куштымаш, мыскара лийыныт. Тыгак ава-ача-влак йӧратыме воспитательыштлан пеледыш аршашым, пӧлекым уло кумылын пӧлекленыт, чон гыч лекше тыланымашым ойленыт. Мыйын ӱдыремат йочасадыш пытартыш ий коштеш, тудын воспитательжылан изирак пӧлекым кучыктышна.
Олеся Антипова, Татарстан, Арск район,
Шорамучаш ял:
– Тиде кече чонемлан пеш лишыл. Молан манаш гын мый шкеат Татарстан кундем, Арск район Шорамучаш ялысе йочасадыште 10 ий наре пашам ыштенам. Кызыт школышто туныктем гынат, ончыч пырля пашам ыштыше-влак икте-весынам пайрем дене саламлена. Эргым-влак ынде йочасад ийгот гыч лектыныт гынат, тиде пайрем годым воспитательышт-влаклан телефон дене мотор пеледышан открыткым колтена, саламлена.
Татьяна Михайлова, Йошкар-Ола:
– Мый шкеже воспитатель омыл. Йочам-влак йочасадышке коштмышт годым кажне ийын, шарналт кодшо пӧлекым кучыктен, воспитатель-влакым саламлаш тӧчымӧ: группылан – папкым опташ арвер, мӧҥгылан – чоҥымо материалым ужалыше кевытыш сертификат. Тыгак кажне гана пеледыш – ӱдырамашын эн йӧратыме пӧлекше.
Ешыштына ты пайремым огына пайремле. Но теве акамлан ты пайрем лишыл. Тудо воспитатель. Снежана Юрьевна Иванова ынде ятыр ий Волжский район, Часовенная ялысе йочасадыште пашам ышта. Тудлан ача-ава-влак тудым кажне ийын саламлат, шке ыштыме тӱрлӧ пеледышым, фотоальбомым, пырдыжыш сакыме картиным да моло кумылым нолтышӧ пӧлекым пӧлеклат.
Анжела Семёнова, Йошкар-Ола:
– Тиде кече йочасадыште тыршыше кажне пашаеҥын пайремже. Ме кажне ийын чыланыштым саламлаш тыршена. Воспитатель-шамычым (нуно мемнан кумытын улыт, ик тӱҥ да кок алмаштыше), изирак воспитательым да йочасад вуйлатышым. Пӧлек шотеш шукыж годым пеледыш аршашым, шере сийым, чайым, иктаж сертификатым кучыктена. Но ты пайрем годым тӱҥжӧ, очыни, пӧлек огыл. Воспитатель-влаклан ача-ава-влакын таумутышт, поро тыланымашышт шерге.