Озаҥыште – «Марий шонанпыл»

Авт.: Татьяна Ибатиева, Озаҥ ола.

24 декабрьыште Татарстанысе калык-влакын Келшымаш пӧртыштӧ марий вургеман ятыр йочам ужаш лийын.

Чылан нуно «Марийская радуга» фестивальын Гала-концертышкыже толыныт. Тыште Балтаси, Арск, Кукмара, Агрыз, Актаныш районла, Озаҥ ола гыч ӱдыр-рвезе-влак куштымо, тӱрлӧ инструмент дене шоктымо, мурымо да почеламутым сылнын лудмо дене шке мастарлыкыштым ончыктеныт.
«Марий шонанпыл» фестиваль – икмыняр тылзе Президентский грант почеш ыштыме пашам иктешлыше мероприятий. Октябрь тылзыште конкурс онлайн йӧн дене эртен гын, Гала-концертыште сеҥыше-влакым шке шинча дене ужаш логалын. Участник-влак диплом, футболко да тӱрлӧ сувенир дене палемдалтыныт.
Ноябрь ден декабрь тылзылаште кугу опытан да шинчымашан Озаҥысе марий автономийын чолга еҥышт-влак ныл направлений дене мастер-класс-влакым эртареныт. Тиде сомылым шуктымо жапыште автономий пелен «Ал пеледыш» йоча ансамбль шочын. Тудо концертыште у номер дене калык ончыко икымше гана лектын.

«Автономийнан тиде икымше сеҥен налме грантше огыл. 4 ий жапыште кум проектым илышыш шыҥдарыме: кок ансамбльлан тувыр ден кем-влакым уэмдыме, марий семӱзгар-влакым налме, ятыр мастер-классым эртарыме. Тений ынде йоча-влаклан марий тувыр ден кемым ургыктымо», — каласкала Озаҥысе марий автономийым вуйлатыше Людмила Мусихина.

Концертыште Татарстан калык-влакын Ассамблейын Совет исполком вуйлатышыже Константин Яковлеват марий-влакын чолга улмышт нерген каласыш, ыштыме пашаштлан кӱкшӧ акым пуыш.
Тидыже иктым гына ончыкта – автономий чын корно дене кая, марий шӱлышым калык коклаште шарымаште кугу пашам шукта.