1992 ий 23 майыште Озаҥыште Татарстанысе калык-влакын икымше погынышт эртаралтын. Тудын пунчалже почеш Татарстанысе калык-влакын ассоциацийыштым ыштыме. Ик эн ончыч чумырымо 9 обществе коклаште марий калыкын ушемжат лийын.
Озаҥ оласе марий-влакын ушемыштым 1992 ий 28 сентябрьыште регистрироватлыме. Тудым вуйлаташ Г.И.Лисициным шогалтыме. 1999 ийыште Марий-влакын национально-культурный автономийыштым регистрироватлаш пунчалме. Правленийын председательже Г.Н.Митькин лийын, тудо 2003 ий марте пашам ыштен. Правлений вуйлатышын алмаштышыжлан 2001 ий годсек шогышо Л.А.Васильеват шуко надырым пыштен. 2003 ийыште ушемым вуйлаташ А.А.Терентьевлан ӱшаныме. А 2009-2012 ийлаште автономийым С.В.Чикаев вуйлатен. Ты жап гыч кызытсе марте вуйлатыме сомылым Л.И.Мусихина шукта.
Алиса Малова, Озаҥыште шочшо чолга еҥ:
– Кызыт «Марийская радуга» проект почеш пашам ыштена. Тудым ме чолга еҥ Наталья Кукушкина дене пырля возенна ыле.
Йоча-влакым кум направлений почеш шуарена: мураш да семӱзгарым шокташ, кушташ туныктена да марий йылмылан шӱмаҥдена. Нунылан тӱрлӧ конкурсым эртарена, тыгак мастер-класс-влак лиедат. Декабрь мучаште пашанам иктешлена, гала-концертым ыштена. Тыгак ӱдыр-рвезе-шамычлан грант окса дене марий вургемым да йолчиемым ургымо. Тидым йоча-влак лӱмгече концерт годым икымше гана чиеныт ыле.
Татьяна Ибатиева, Шернур кундемыште шочшо чолга еҥ:
– Марий-влакын ушемышкышт вич ий ончыч толынам. Тунам 25 ий темыме пайремлан ямдылалтна. Автономийым лаштыкшым интернетыште почна, моло соцсетьыште пашам ышташ тӱҥална. Рушарня школышто йоча-влакым туныктышым, вара декретный отпускыш кайышым, да вес еҥ ты пашам тӱҥале. Кызытеш пӧртылын омыл.
Ушемнан 30 ияш лӱмгечыжым мылам вӱдаш логале. Эртарен колтымеке, вич ий кокласе пагытым шергал лектым. Тунам участник-влакын костюмыштат тошто ыле. 2017 ийыште пайремна лийын гын, а 2018 ийыште грантым сулен налынна, кодшо ийын, теният грант конкурслаште сеҥенна. «Лай мардеж» ансамбльлан Татарстанын президентше 400 тӱжем теҥгем ойырен ыле. Тунам тиде да «Озаҥ марий» ансамбль-влаклан вургемым ыштенна, семӱзгар-влакым наледенна, а тений йоча-влакым чиктенна. Вич ийыште шкешотан сеҥымаш да кугу ошкыл лийыт! Пашана южгунам огешат кой, очыни, но тыгай ончыко кайымаш да шуктымо ты сомылым вуйлатыше-влак дене чынжымак кугешнаш кӱлеш.
Фото-влакым Татарстанысе Калык-влакын келшымаш пӧртыштын порталышт гыч налме.
ТИДЫН НЕРГЕН ТӰРЫС СТАТЬЯМ «КУГАРНЯ» газетыште лудаш темлена.