Коронавируслан кӧра регионлаште чӱчкыдынрак шолыштыт.
Марий Элысе МВД-н пашаеҥже-влак тӱткырак лияш йодыт. Вирус шарлымылан кӧра мошенник-влак, еҥшамычын законым палыдымыштлан эҥертен, оксам шолыштыт. Нуно икмыняр схеме дене пашам ыштат.
- Мӧҥгыштӧ шинчыме режимым пудыртымо нерген смс-серышым колтат да палемдыме номерыш штраф шотеш оксам колташ йодыт.
Тыгай серышлан ида вашеште да оксам ида колто. Штраф – тиде санкций, амал деч посна уремыште коштмылан административный правонарушений. Нарушений нерген полиций пашаеҥ протоколым тендан ончылно воза да умбакыже судыш колта. Тунам веле тыланда штраф нерген серыш толеш.
- Те але родыда черланенда манын йыҥгыртен ойлат.
Мутлан, черланыше еҥ дене ик автобусышто кудалында але ик самолёт дене чоҥештенда манын кертыт. Эмганыше-влаклан компенсацийым тӱлаш йодыт. Але тыланда социальный выплатым пуышаш улыт манын ӱшандарат. Мошенник-влакын тӱҥ цельышт – оксам да дене пайдаланаш. Банк картын реквизитшым, картын вес велже гыч кӱчык кодым, телефоныш толшо кодым нигӧлан ида ойло. Тыгай йыҥгыр пурымеке, телефондам чарыза да лишыл еҥдавлак деке шке йыҥгыртен йодса.
- Тазалыкым аралыме тӱнямбал организаций деч серыш-влак толыт. Коронавирус инфекций дене черланыше-влаклан оксам погаш полшаш йодыт.
Тазалыкым аралыме тӱнямбал организаций, тазалыкым аралыме орган да эмлымвер-влак тыгай серыш-влакым огыт колтыл. Электрон почтышкыда тыгай серыш толын гын, вигак ӱштын кудалтыза. Палемдыме сайтыш ида пуро.
- Коронавирус инфекций улмым тест негызеш тергаш темлыше сайт-влак.
COVID-19 черлан анализым врачын темлымыж почеш эпидемиологий да гигиене рӱдерлаште оксам тӱлыде сдатлаш лиеш.
- Интернетыште коронавирус чер ваштареш «юзо-таблеткым», «юзо-маскым», «юзоантисептик»-влакым ужалат.
Нине «юзо» препарат-влак тыглай кевытысе сату улыт, акым гына кӱзыктеныт. Уто оксам тӱлен, аферист-влак деч интернет-кевытлаште тыгай сатум ида нал. Чын да кӱлешан эмым врач гына темлен кертеш.
- Кугурак ийготан але вашке ӱшандараш лийше самырык-влак деке шоя «врач-влак» лектыт да COVID-19 чер улмым пачер еда терген коштыт. Пачерыш логалмеке, оксам да шергакан арверым шолыштыт.
Палыдыме еҥ-влакым шке пачерышкыда ида пурто. Йӧнда уло гын, могай организаций гыч улмыштым пален налын, тушко йыҥгыртен йодса. Тыгодым номерым нунын деч огыл, а официальный сайтышт гыч налман. Илалше-влаклан тыгай «уна-влак» толмо нерген родо-тукымлан йыҥгыртен увертарыман.
Марий Эл Республикысе МВД-н пашаеҥжевлак мемнан регионышто тыгай ситуацийвлак лийын огытыл манын ойлат. Туге гынат тӱткылыкым ида йомдаре!