29 октябрьыште Россий Федерацийын национальный гвардий войскажын (Росгвардийын) вневедомственный охране пашаеҥже-влак шке профессионал пайремыштым палемдат.
Вневедомственный охране кугыжаныш службылан шотлалтеш. Пашаеҥ-влак поснак кӱлешан да режимный, моло объект-влакым оролат. Тыгак общественный порядкым шуктымо да еҥ-влакын лӱдыкшыдымылыкышт верч шогат.
Медведево посёлко гыч Иван Рыбаков Росгвардийын вневедомственный охраныштыже служитлаш армий деч вара вигак тӱҥалын. Рядовой семын пашаш толшо рвезе полиций капитан марте кушкын, а ончылно – эше у должность, у кӱкшыт.
«Мыйым армийыш наҥгайыза!»
Такшым йочаж годым Иван пожарный лияш шонен. Тиде шонымашыже шукталтынат, манаш лиеш: Угарман кундемысе Сатис посёлкышто МЧС войскаште призыв почеш службым эртен. Южо рвезе армий деч шылаш тырша гын, И.Рыбаков, школым да Медведевысе автодорожный техникумым автомеханиклан тунем пытарыше, военкоматыш миен да «Мыйым армийыш наҥгайыза» манын. Тидын нерген ончыч ача-аважланат каласен огыл, нунышт эргыштым ужатыме деч икмыняр кече ончыч гына пален налыныт. Туге гынат Маргарита Ивановна ден Вячеслав Семёнович икшывыштын ойырен налме корныжым вашталташ, шонен пыштымым шуктымо деч чараш ик ганат тыршен огытыл. Мӧҥгешла, шочшыштлан полшен гына шогеныт.
«Пашатым утыждене чот йӧратет»
2009 ийыште, армий гыч пӧртылмеке, Иван паша верым кычалаш тӱҥалын. Палымыже-влак вневедомственный охраныш (тунам эше МВД системыш пурен) каяш темленыт. Тудо ийынак август гыч Иван Рыбаков ты подразделенийыште служитла.
Ончыч пел ий стажировкым эрташ кӱлын. Вара милицийын изирак сержантше Иван Рыбаков задержаний группын милиционерже лийын. Коллегыже-шамыч дене объект-влакым ороленыт, общественный порядкым шуктымым тергеныт, осал пашам ыштыше-шамычым кученыт.
– 2010 ийыште МОСИ-ш юристлан тунемаш пуренам. Вара милицийым полицийыш кусарышт, а 2016 ийыште Россий Президентын пунчалже почеш вневедомственный охраным МВД системе деч ойыреныт да Национальной гвардий войскан Федеральный службын составышкыже пуртеныт. Тудо жаплан отделений командир должностьышто лийынам, задержаний группыштак пашам ыштенам, – каласкала И.Рыбаков.
Росгвардийыш куснымеке, институтым тунем пытарыше Иван Рыбаковлан службым организоватлыме шотышто группын инспекторжо лияш темлат. Тиде офицерский должностьлан шотлалтеш. 2020 ийыште икымше рото командирын алмаштышыже лиеш. А ӱмаште пашаже эшеат ешаралтын, вет самырык пӧръеҥым батальон командирын алмаштышыжлан шогалтат. Подчиненийыште – эшеат шуко еҥ, кугу ответственность.
Полиций капитан Рыбаков документ дене пашам ышта, личный составым терга, воспитатлыме пашам шукта. У пашаеҥ-влакым службыш налеш. Нунын дене служитлаш шонышо самырык пашаеҥлан чыла палдара, умылтара, рашемда.
Эше Иван Рыбаков республикысе тӱрлӧ организацийыш лектын коштеш, ятыр мероприятий ден вашлиймашым эртара, тунемме тӧнежлаште ӱдыр-рвезе-шамычлан Росгвардийыште службым эртыме нерген каласкала да ончыкыжым пашаш толаш кумылаҥда.
– 20 ий службо деч вара сулен налме канышыш лекташ йӧн уло. Ик могырым ончымаште, тиде моткоч шуко манын шонаш лиеш. Но жап вашке эрта. Мый шукерте огыл погонан лийынам гай чучеш, но тидлан 17 ият эртен. Собеседований годым чӱчкыдын шкемымат пример шотеш кондем. Армий деч вара ик вере да вес вере пашам ыштен кошташ огыл, лучо службыш вигак толаш манын умылтарем.
Кызыт шуктымо сомылем моткоч келша. Еҥ-влак дене вашлияш, службо нерген палдараш, вашкылым ышташ. Шке пашатым утыждене чот йӧратет, канашат кӱлеш маныт южгунам лишыл еҥем-влак, – ойла полиций капитан.
Кеч-могай паша айдемым вашталта. Службыш толмо почеш И.Рыбаков савырлырак (скромный) лийын гын, кызыт кӧргӧ вийже, пеҥгыдылыкше утларак погыненыт, еҥ-влак дене кутырымаштат тиде шижалтеш.
Парашют дене – 21 гана
Паша але службо деч нояш огыл манын, ятыр еҥын чоным да вуйушым кандарыше сомылжо, хоббиже уло. Иванын тиде – парашют спорт.
– Парашют дене тӧршташ шонымаш эре лийын. Икана оласе уремыште кудалше автомобильын шеҥгел яндаштыже тидын нерген уверым ужынам. Вара йолташем дене коктын шинчылтмына годым тудлан парашют дене пырля тӧршташ темленам, тудо келшен. Палемдыме кечын йолташем дек йыҥгыртенам да аэроклубыш ӱжынам, а тудыжо тореш лийын, мый мыскарам ыштем манын шонен.
Чылаже 21 гана парашют дене тӧрштенам, эре инструктор деч посна. Но кажне гана икымше гаяк лӱдмашан. Тӧрштымӧ деч ончыч лӱдмым чарнет гын, тиде сомылым ыштымым ик жаплан але йӧршеш чарныман, маныт парашют спортышто. Вет кунам айдеме лӱдмым чарна, тудо чыла кертам манын шона, тидыже парашют дене тӧрштымӧ годым южгунам туткар марте шуктен кертеш.
Тӧрштымӧ деч ончыч гына самолётышто шучкын чучеш. Южыш йолтошкалтышым ыштетат, чыла тургыжланымаш йомеш. Кӧргыштӧ – ласкалык, йырымваш – шып, пуйто книгагудышто улат. Тиде тат эн шерге. Парашют дене тӧрштымым эн сай перезагрузкылан шотлем. Садлан, паша верыште шинчен ноенда, чылажат йыгыжтарен гын, аэроклубыш каяш темлем, – манеш Иван.
Тудлан куаным кондышо эше ик сомыл – колым кучымаш. Тидат вуйым кандараш полша.
Паша кече деч вара И.Рыбаков мӧҥгыжӧ вашка, вет тушто тудым йӧратыме еҥже вуча. А тиде, пӧръеҥын мутшо почеш, ончыкылык сеҥымашлан вийым ешара, эшеат тыршен пашам ышташ кумылаҥда.
Рыбаковмыт ешыште Иван деч молыжо погонан-влак уке улыт. Вячеслав Семёнович – Марий Элын сулло чоҥышыжо. Маргарита Ивановна кызытат йочасадыште воспитательлан пашам ышта. Нуно эргышт дене кугешнат, а Иван ача-аважлан йолымбак шогалтымыштлан да эре пелен улмыштлан таушта.
Иван Рыбаковым да коллегыже-влакым профессионал пайремышт дене саламлена! Мемнан лӱдыкшыдымылыкна верч тыршымыланда тау!
И.Рыбаковын альбомжо гыч налме фото.