Курчак театр олаштына ик эн оҥай да юзо шӱлышан верлан шотлалтеш. Тушто йӧратыме йомак гыч герой-влак чонан лийыт, мастер-классыште курчак-влак дене модаш туныктат, кугу пайрем вашеш ятыр мероприятий ден вашлиймаш эртаралтыт. Но чыла тидым кӧ вуйлата? Кушто да кунам мероприятий-влак лиймым кӧ пала? Нине йодышлан вашмутым муаш эртыше кечылаште Курчак театрыш миен савырнышым.
Мыйым тӱҥ администратор Юлия Леонидовна вашлие. Театр мучко экскурсийым эртарыш да тыгодым тӱҥ сомылжо нерген каласкалыш.
Тӱрлӧ амалым муыт
Ю.Громовая И.С.Палантай лӱмеш тӱвыра да сымыктыш колледжым йоча-влак дене пашам ыштыме направлений дене тунем пытарымеке, Калык культур йӱлам шочыктышо рӱдерыште пашам ыштен. Вара Курчак театрыш администраторлан куснен. Ик ий гыч тудлан тӱҥ администраторын сомылжым шукташ ӱшаненыт. Кызыт Юлия Леонидовна ончышо-влак дене пашам ышта, театрыш шукырак коштышт манын тырша, тыгак спектакльым ончыктымым эскера.
– Подчиненийыштем икмыняр еҥ уло. Ме йочасад, школ, тӱрлӧорганизаций дене кылым ыштена. Зритель-влак дене пашам ыштыме шотышто ик ийлан планым ямдылена. Тудым шукташ манын, мыняр спектакльым изи, кугу заллаште эртараш, мыняр верыш лекшаш улына рашемдем да эскерем. Спектакль-влакысе рольым артист-шамыч коклаште шеледена, да нуно посна организацийыште сомылыштым шуктат. Ты паша кажне арнян ышталтеш: кок гана районлаш лектын коштыт, моло кечын – Йошкар-Олаш да Медведево посёлкыш.
Районлаш лекме годым репертуар гыч чыла спектакльым ончыктен огына керт, молан манаш гын йочасадыште, школлаште зал-влак изирак улыт да мемнан декорацийна-влак огыт шыҥе, – палдара Юлия Леонидовна.
Курчак театрыш ончаш толшо-влак коштышт манын, тӱрлӧ йӧным кучылтыт. Мутлан, пайрем лишан мероприятий-влакым эртарат. Поснак Ава, Ӱдырамаш да Пӧръеҥ кече-влак вашеш ача-ава ден икшыве-шамычым залыштышт погат, спектакль гыч герой-влак тӱрлӧ модыш дене модыктат, мурым мурыктат. Тыгак тӱрлӧ спектакльыш соцкыл гоч ӱжмашым модын налаш йӧным ыштат. Шукерте огыл экскурсийыш ончаш толаш онлайн йодмашым пуаш йӧным ыштеныт. Сандене Курчак театр уло кумылын кугыеҥ ден йоча-влакым унала вуча.
Талантан артист-влак
Кызыт Курчак театрыште ятыр мастер-класс ден экскурсий эртаралтыт, ончаш толшо-влакым сымыстарат.
– Мастер-класс курчакым вӱдымӧ дене кылдалтын, тыгак кузе нуно ышталтыт, могай спектакльыште кучылталтыт, палдарена. Актёр-влак иктаж спектакль гыч эпизодым модын ончыктат, вара ты пашам ыштен ончаш кумылан-влаклан темлат.
А экскурсий годым театрын тоштерже, залже, сцене дене палдарат. Шукерте огыл ончыкташ тӱҥалме «Юзо шиялтыш» этно-экскурсий калыклан поснак келша, сай кумылым луктеш. Тудо тошто марий йомак негызеш шындалтын да 30 минут шуйна. Тушто герой-влак рушла мутланат гынат, марий муро йоҥга. Театрын артистше-влак талантан, кугу опытан улыт, сандене тӱрлӧ ийготан ончышо-влак дене кылым муын моштат, – ойла Ю.Громовая.
Экскурсийыш 15 еҥан да кугурак тӱшка-влакым чумырат, тыгак оксам ешарен тӱлен шкетынат ончаш йӧн уло.
Спектакль — кугыеҥланат
Курчак театр у кӱкшытыш шуын, тушто йоча-шамычлан веле огыл, кугыеҥланат спектакльым шындат. Нунын кокла гыч «Йӱд орол», «Йӱксалче», «Сны» да моло спектакль-влакым палемдаш лиеш.
– Чаманен каласаш кӱлеш, кугыеҥ-влаклан келыштарыме спектакльыш ончышо-влак шагал толыт. 2011 ийыште «Прекрасное далеко» спектакль икымше гана шындалтын. Кызыт кӧ эре ончаш коштын, нунак гына толыт. Но ончаш толшо-влак шкаланышт эре ум налыт, спектакль южыштын шинчавӱдыштымат луктеш. Кӧ умылен шуктен огыл гын, ик спектакльышкак икмыняр гана толыт, – мане тӱҥ администратор.
10 ёлко
– У ий вашеш кажне кечын эр гыч кас марте пашам ыштена. Кызыт «Вуйлатышын ёлкыжлан» ямдылалтына. Тений кож воктене лу пайрем лийшаш. Тушто Йӱштӧ Кугыза ден Лумӱдыр, ятыр персонаж икшыве-влак дене модаш тӱҥалыт. Тыгак кажне гана тӱрлӧ спектакльым ончыктена, – мане Юлия Леонидовна.
Пайремыш СВО участник-влакын йочашт деч посна олимпиадылаште, научный, технический, творческий конкурслаште, выставкылаште да фестивальлаште, спорт таҥасымашлаште сеҥыше-шамыч, йоча мер объединений-влакын активистышт ушнат.
Курчак театр шуко оҥай мероприятийым ямдыла. Сандене ача-ава да икшыве-влаклан тушко миен толаш темлена.
Ю.Громоваян альбомжо гыч налме фото.