24 январьыште Йошкар-Олаште Сеҥымашын XXX Идалыкше лӱмеш тӱвыра полатыште Туныктышын да наставникын идалыкыштым торжественно мучашлыме. Кундемнан тӱрлӧ верже гыч толшо туныктышо ден воспитатель-влакым шокшын саламлыме, шуктен толмо кӱлешан пашаштым палемдыме. Пайремыш Марий Элым Вуйлатыше Ю.Зайцев толын.
Тудо эртыше идалыкыште образований аланыште мо ышталтме нерген ойлен, туныктышо, наставник-влакын куштылго огыл пашаштым кӱкшын аклен. Марий Элым Вуйлатышын мутшо почеш, туныктышо-влаклан умбакыжат кугу тӱткыш ойыралташ тӱҥалеш. Ӱмаште кундемыштына тӱрлӧ кӱкшытан тӱжем утла мероприятий эртаралтын. Тиде тӱрлӧ форум, конференций, семинар, тыгак профессиональный мастарлыкым нӧлтымӧ конкурс-влак. Тыгак 2023 ий 1 сентябрь гыч педагог-влакын пашадарышт 15 процентлан кӱзен.
Ӱмаште Марий Эл Правительстве полшымо дене тунемше-шамычын российысе олимпиадын округысо, регионысо йыжыҥлаштыже сеҥыше ден призёр-влакым ямдылыше туныктышо-влаклан икымше гана грант полышым ыштыме.
Ю.Зайцев яллашке пашаш кайыше самырык туныктышо-влаклан полышым пуымо нерген каласен. Тений 1 январь гыч единовременный выплатым 300 тӱжем марте кугемдыме.
Марий Элысе образований да науко министр Л.Ревуцкая саламлымашыш ушнен, туныктышо-влакын пашаштым моктен ойлен. Йошкар-Олан мэрже Е.Маслов Йошкар-Олаште школ-шамычым ачалыме, чоҥымо нерген каласкален. Тыгак рӱдолаште калык шукемме нерген ойлен. Тудын мутшо почеш, 10 ийыште Йошкар-Олаште илыше еҥ-влак 15 процентлан ешаралтыныт гын, йоча-шамыч вич ийыште тынар процентланак шукемыныт. Йошкар-Оласе 30 гыч 13 школжым шотыш кондат, уэмдат. Кум кугу школ чоҥалтеш.
Образований системыште тыршыше икмыняр туныктышылан сулло лӱмым пуымо, тыгак шуко педагог ден воспитательлан чапкагазым, таумутым кучыктымо.
И.Речкинын фотожо-влак.