Дмитрий Кревецкий Россий МЧС-ын Марий Элысе тӱҥ управленийжын специализироватлыме пожарный частьыштыже мастер-пожарныйлан пашам ышта. Куд ий жапыште рвезылан (моло утарыше-влак семынак) тӱрлӧ сынан туткарым ужаш логалын. Вет тиде частьыште тыршыше-влакым тул озаланыме годым веле огыл, аварий але вес неле ситуаций годымат ӱжыктат. Тӱҥжӧ – еҥ-влакын илышыштым утараш, калыкым туткар годым аралаш. Лач тидыжак самырык рвезым ты пашам ойырен налаш кумылаҥден.
– Шочмо-кушмо пӧртем Йошкар-Олаште, пожарный часть воктенак верланен. Сандене изинек пожарный машина-влакым ужынам, а тыште тыршыше пӧръеҥ-влак мылам эн виян, эн патыр гай чучыныт. Тунамже лач тиде профессийым ойырен налам манын шонен омыл. Кугурак лиймекем, полиций паша я военный сомыл нергенат шонкаленам. Но армийыште военный илышым ужын ситаренам. Адакшым еҥ-шамычлан полшаш кумыл лийын. Тыге пожарный утарыше лийым, – мане Дмитрий.
Еш нерген
Рвезе туныктышо ешыште шочын-кушкын. Дмитрийын кочаже – лӱмлӧ профессор, технике шанче доктор Яков Абрамович Фурман, коваже Лидия Дмитриевна Фурман Политехыште (кызыт Волгатех) англичан йылмым туныктен, ачаже Александр Владимирович Кревецкий Волгатехыште информатике кафедрым вуйлата, а аваже Ирина Пиониевна Кревецкая строительный техникумышто менеджментым туныктен. Дмитрий вестӱрлырак корным ойырен, кызыт Иваново оласе пожарно-спасательный академийыште пытартыш курсышто заочно тунемеш. Рвезе ешан, пелашыже уло.
Пожарныйын портретше
Еҥ-влаклан туткар годым полышым пуаш манын, шкалан моткоч пеҥгыде койыш-шоктышан, чот чытыше лийман. Пожарный я утарыше профессий мо дене неле улмо шотышто Д.Кревецкий тыгерак мане:
– Лӱдыкшӧ годым чон-кумыл тарванымым чытыман, чаманен, ойыырен шогыман огыл. Ончыч пашатым ыште, утаре, полышым пу, вара чаманенат, ойгыренат, тургыжланенат кертат. Такшым мемнан пашаште лывырге кумылан лийман огыл. Санденак пашаш пурымо годым тыгай койыш шотышто тергалтына. Ме тӱрлӧ сӱретым ужына. Чылажым чон вошт колтет гын, шкеже йӱлен пытет. Кажне пожар я аварий тӱрлӧ. Шинчымашым погенна, тактикына уло, приказым шуктена, тыгодым садак шукыжым ситуаций почеш шкеак шонен ышташ логалеш. Сандене шонен моштышо да пеҥгыде лийман.
Шарналт кодшо туткар
– Эн шучкыжо,эн нелыже ушеш кужу жаплан лакемалт кодеш. Икмыняр ий эртен гынат, Йошкар-Ола воктенысе Алёнкино ялыште склад-влак йӱлымым да тудо пожарым йӧртымым шарнем. Весе – шукерте огыл Йошкар-Оласе Маятул кевыт воктене индеш пачашан кок пӧртым аралышна, ятыр еҥым утарышна. Шучко ыле. Тыгак эртыше кечылаште марий чодыранам аралышна. Чодыра тул Студёнка посёлкыш «пурен» ыле, пилораме чот йӱлыш, тысе илыме пӧрт-влак верч чот тыршаш логале. Тиде, очыни, нигунам ок мондалт, – каласкала Дмитрий.
Эре ямде улыт
Марий Элысе чодыра пожарыште Дмитрий моло семынак икымше кече гычак тыршен. Тылеч ончыч рвезе Марий Элысе утарыше-влак тӱшка дене Мордовийысе чодыра пожарым чарымашке миен, арня наре тушто илен.
– Мемнан частьна утарыше-влакым чумырымо аэромобильный тӱшкаш пура. Ме кеч-могай чрезвычайный ситуаций годым кеч-могай регионыш полышым пуаш тарванен кертына. Шукерте огыл Мордовийыш чодыра пожарым чактараш миенна, толмеке, икмыняр кече гыч шкенан чодырана азапыш логале. Ме такшым чодырасе тул ваштареш кучедалаш тунемынна. Но садак чодыра пожар эн неле да эн шучко манын кертам, – ойла Д. Кревецкий.
Таза илыш-йӱлам кучыман
Пожарный да утарыше-влаклан капкыл тазалыкым эскерыман. Сандене физкультурлан да спортлан тыште кугу тӱткыш ойыралтеш. Норматив-влакым шуктымо деч посна пожарный-влак тӱрлӧ таҥасымашыште мастарлыкым нӧлтат. Дмитрий Кревецкий кажне ийын гаяк газодымозащитный службо-влаклан эртаралтше таҥасымашыш коштеш. Теният тудын командыже республикыште «Лучшее звено ГДЗС» лӱмым сулен.
