Олам чевертыше сÿрет

Чонышто усталык шÿлыш уло гын, тудо кунам-гынат илышыште шкаланже верым муеш. Йошкар-Ола уремлам сöрастарыше мотор сÿрет-влакым ужмеке, ушышко лач тыгай шонымаш толеш…

Ты сÿрет-влак «Краски города» стрит-арт проект почеш шукталтыныт. Тудым самырык сÿретче Илья Белов ямдылен да ÿмаште самырык-влакын пашашт шотышто «Росмолодёжь» Федеральный агентствын эртарыме конкурсышто ты проектше дене грантым сеҥен налын.

Фото: «Чия возеш — сÿрет шочеш».

Паша ик ий наре шуйнен. Телым ÿдыр-рвезе-влак граффити жанрыште тыршыше уста сÿретче-влак дене икмыняр вашлиймашым эртареныт, уремысе сÿрет сымыктыш нерген лекцийым колыштынат. Вара фанер дене ыштыме стендеш арт-сÿрет-влакым ышташ тунемыныт, сÿретлаш келшен толшо идалык пагытым вученыт.

Кызыт рÿдоласе уремлаште але кудывечылаште тÿрлö тÿсан сÿрет-влакым ужын, чон куана.

Тачылан проектын тÿҥ шонымашыже шукталтын, манаш лиеш.  Еҥ-влак деч поро мутым чÿчкыдын колына, эсогыл вес кундемла гыч толшо-влак чылан гаяк сÿретан пырдыж-влак воктене фотом ышташ тыршат. Ынде нине арт-сÿрет-влак Марий Элнан шкешотан чурийже улыт.

Илья Белов, «Краски города» арт-проектым авторжо:

– Йошкар-Олам сÿрет-влак дене сöрастараш шукертак кумыл лектын. Но ола администрацийын разрешенийже да ойырымо оксаж деч посна тидым нигузе ыштен кертын огынал. Садлан ÿмаште ме, öрын шогыде, шке вийнам грант конкурсышто терген ончышна. Мемнан шонымашнам умыленыт, оксам пуэныт, а ме идалык мучко уло кумылын шукерте шонен коштмо пашанам ыштенна.

Ты проектыште шым команде лийын. Кажне командылан ик объект пуалтын. Тушто 2 гыч 12 еҥ тыршен, 40 еҥ пашам ыштена.

Эскиз-влакым кажне тÿшка шкаланже шке ямдылен. Кушан, могай пырдыжеш сÿретлышашым ме шкеак кычалынна. Сÿрет калыкын чÿчкыдынрак коштмо верыште лийже манын тыршенна. Тыгак сÿретлаш келшен толшо пырдыжым ойырен налме. Штукатуркан верлаште, мутлан, сÿретлаш куштылгырак, кермычеш – нелырак.

Чыла объект кокла гыч кумытшо марий калык дене кылдалтын. Воин-интернационалист-влак уремысе пöрт пырдыжыште «Ший пÿан Ший Пампалче» сÿретым, Ленин проспект уремыште «Калыкын шепкаже» да Эшкинин уремыште «Шочмо кундем» сÿрет-влакым ужын кертыда.

Кызыт «Краски города» проектым ыштен шуктенна. Ончыкыжым у проект-влак почеш сÿретлаш, тÿрлö теме почеш сÿрет-влакым ышташ тÿҥалына. Игече сай шога, сÿретлыме тургым эше петырнен огыл…

Кумылым нöлтышö вер-влак

Ты сÿрет «Шочмо кундем» маналтеш. Тудо Эшкинин урем 6-шо пöрт воктене верланен. Марий ÿдыр, шинчам кумен, шке шочмо верже нерген шонкала:

«Калыкын шепкаже – пÿртÿс» – тыге маналтеш Ленин проспект уремыште Вантовый кÿвар воктене верланыше тиде сÿрет:

Йошкин пырыс – Йошкар-Олан ик эн оҥай символжо. Ты сÿрет лачак тудлан пöлеклалтын. Воин интернационалист-влак урем 21-ше номеран пöрт воктене верланен:

Воин интернационалист-влак урем 23 А пöрт воктенысе будкым «Ший пÿан Ший Пампалче» сöрастара. И. Беловын ойлымыж почеш, марий йомакыште Пампалчым акаже утара гын, тыште ÿдыр шиялтыш дене сылне семым луктын, пÿртÿс вийым пога, тудын деч полышым йодеш:

Алёна Яковлева.
Фотом И.Беловын архивше гыч налме.