Медведево районышко пурышо 46 суртан Юркан ял Йошкар-Ола аэропорт ваштареш ик меҥге тораште Изи Какшан эҥер могырышкыла верланен. Чевер кеҥеж кечын, лапкарак дамбысе тыглай корно дене турий мурымо йӱкым колыштын ошкылын, ялышке рӱдӧ корно гыч 15-20 минутышто миен шуаш лиеш.
Ял уремышке пуретат, сурт воктенысе савар але капка деран кекеклен коштшо иган але игыдыме чыве-влакым вашлият. Нунын пелен, оҥым кадыртен, салтак гай рыҥ коштшо ош я йошкар-кӱрен тӱсан агытан-влак иктын-коктын палдырнат. Коклан ала-кушто пий опталта. Ушкал ломыжалтыме але шорык йӱк ок шокто. Тиде ялыште иктаж лу ий утла иктат ушкалым огеш ашне.
Ял урем ару. Каласыман, корным ял калык шке кидше дене ыштен, манаш лиеш. Кок могырышто пӧрт-влак сӧралын койыт. Нунын коклаште кок пачашанат палдырна. Еҥ-влакын пакчаштышт олмапу-влак пеледалт шогалыныт, мотор оръеҥ гай койыт.
Суртоза-влак чыла гаяк пакчасаскам: шоганым, ковыштам, пареҥгым, кешырым да тулеч молымат – шындыл-ӱденыт. Светлана Викторовна ден Владимир Иванович Янгаевмытат шошо пакча сомылыштым пытареныт. Каналташ манын, урем могырышкыла шукертак чоҥымо, пластик кленча петыртыш-влак дене Лена ӱдырыштын сӧрастарыме пулдыр пырдыж воктеке лектын шинчылташ йӧратат.
Пошкудыштат, «Шойбулакский» совхозын ончычсо тале животноводшо, Пашан ветеранже, 80 ияш Валентина Петровна Соловьёва, 1970-80-ше ийлаште кермыч дене ыштыме суртшо ончыко лектеш. Самырык жапысе пагытшым шарналташ йӧрата. Мыламат шке илышыж нерген кужун каласкалыш.
Юркан ялыште илыше-влак пашашке я Йошкар-Олашке, я Шойбулакышке коштыт. Иктыжым, Игорь Васильевич Суворовым, оролышо предприятийыште пашам ыштышым, дежурство смене гыч толмыж годым вашлийым. Чурийже куаныше ыле. Кок ӱдыр икшыван. Наташа ӱдыржӧ эргым ыштышаш манме уверлан пеш куанен.
А теве Василий Павлович Аптубаев урем корным казна могырым кунам уэмдыме пашам тӱҥалме верч пеш тургыжлана. Кызыт Руслан эргыж дене у пӧртым тышакынак, ялыште, чоҥаш пижыныт.
Почто машинан водительже Дмитрий Васильевич Сувороват сай корно верч азаплана. А теве Шойбулак участковый больницын водительже Иван Васильевич Кукушкин ялын историйжым шымла. Шкенжын да пошкудыжо-влакын тукымвожыштым рашемда. Тылеч посна тудо сай суртоза. Пакчасе йыраҥ-шамычым, посна-посна печен, пеш арун тӧрлен шынден.
Икманаш, тачысе пагытыште Юркан ял ила, ончыкылыкшат тудын сай. Мыйын шонымаште, тудо тӱзланаш да эркын-эркын кушкаш тӱҥалеш.
Иван Речкин.
