Марий Элын тӱвыран сулло пашаеҥже, мурызо Анна Османован мурыжо-влакым калык тачат йӧратен колыштеш. Ойганрак улыт гынат, нуно илыш нерген келгын шонаш таратат, южгунамже шинчавӱдымат луктыт.
У Торъял район Куэр почиҥга ялеш шочын-кушшо Анна Евдокимовна Йошкар-Оласе культпросветучилищым хор вуйлатышылан тунем лектын. Дипломым налмеке, шочмо Немда кундемысе (Човыксола, Овалже) тӱвыра пӧртым кандаш ий вуйлатен, вара индеш ий – У Торъял районысо тӱвыра пӧртым. Тудо ынде ятыр ий Йошкар-Оласе Сеҥымашын XXX идалыкше лӱмеш тӱвыра полатыште арулыкым эскерыме шотышто вуйлатышылын тырша.
– Тӱвыра пӧрт кӧргыштат, уремыштат арулыкым эскерена. Пашаеҥ-влак моткоч сай, икоян улыт. Кызыт неле пагытыште илена. Пашаеҥна-влак коклаште южыштын уныкашт Украиныште элнам аралат.
Усталык паша шотышто эн кугу йолташемлан Раисия Михайловна Даниловам шотленам. Районлашке Раисия Данилова, Сергей Пчёлкин, Светлана Петрова, Володя Матвеев, Анатолий Зарецких дене пырля лектын коштынам. КПРФ-лан выступатленна. Жапше годым кундемыштем комсомол секретарь лийынам. Ялыште шочын-кушшо айдеме садак илышыжым ялозанлык пелен тӱҥалеш.
Илышыште айдемын чыла шке жапыштыже лийшаш. Юмылан тау, Иван Васильевич Османов дене ешым чоҥенам, кок ӱдырна, ныл уныкана улыт. Надежда ӱдырем пеленем пашам ышта, Татьяна Йошкар-Оласе ик школышто руш йылме ден литературым туныкта. Илышлан куанен гына илем.
Мурымо шотыштат чылажат шке жапыштыже лийшаш, шонем. Сцене гыч кунам кайымым палыман. Икмыняр ий ончыч иктешлыше концертым эртарышым. Тиддеч вара молан уэш сценыш лектам?
Мыняр муро улмым ом шотло. Муро тачат калык коклаште йоҥгалтеш гын, тугеже илышем арам илен эртарен омыл. Пытартыш жапыште икмыняр у мурым лукташ ямдылалтам, – мане А.Османова.