Юлиан Денисов Волжский район Ӱлыл Азъялыште шочын-кушкын. Кызыт Волжск оласе полицийыште тырша. Ойыртемалтше лӱмым нумалмыж нерген тыгерак каласкалыш:
– Ачам, авам, акам мыланем Денис лӱмым пуаш кутырен келшеныт улмаш. Ала-кушеч пошкудына тидын нерген пален налын да лишыл еҥем-шамычлан вес лӱмым пуаш темлен. «Тукымыштыда тыгай лӱман еҥ уло, эше ик – Денис Денисовым ыштынеда мо?» манын. Валентина пошкудына – усталык шӱлышан еҥ. 2000-ше ийлаште Юлиан лӱман мурызын творчествыжым эскерен улмаш, садлан мыланемат тыгай лӱмым пуаш лиеш манын. Лишыл еҥем-влак келшеныт.
Юлиан-влак виян, шонымашкышт шуаш тыршыше, кеч-кунамат полшаш ямде, поро кумылан улыт. Изиэм годым пырля модын коштшо йолташем-шамыч мыйым Юлик але Юлий манын лӱмденыт. Иктаж-кӧ дене палыме лийме годым лӱмем ойлем да шукынжо ӧрыт. Тыгай лӱман-шамыч дене эше вашлиялташ логалын огыл ыле маныт. Поснак паша дене вес кундемлашке лектын коштмо годым тыгайже палдырна.
Мыланем шке лӱмем моткоч келша. Тудо ойыртемалтше, нигӧн уке гай. Мемнан районышто мый шкет тыгай улам, тидыжак кумылем нӧлта. Ойыртемалтше лӱман улмемлан мыйым фамилий дене шагалже годым ойлат. Вигак пале – Ӱлыл Азъял качымарий улам.
Ю.Денисовын альбомжо гыч налме фото.