Юстина
Тыгай лӱман марий ӱдыр ила ешыж дене 2020 ий годсек Рязань олаште. Юстина лӱмым тудлан Христина аваже пуэн.
– Мый медпашаеҥ улам. Йошкар-Оласе медколледжыште тунеммем годым ик эмлымверыште практикым эртенам. Икана омса вес могырым ава ӱдыржым Юстина манын ӱжын (чынжым гын, ӱдыр Устиния лийын улмаш). Но мый Юстина манын колынам. Мылам моткоч келшен тиде лӱм. Ӱдырем лиеш гын, тудлан Юстина лӱмым пуэм манын ушышкем пыштенам. Тыге Юрий пелашем дене когыньнан 2017 ий 18 апрельыште Юстина ӱдырна шочын.
Шӱм падырашна моткоч уста. 4 ияш годсек «Созвездие добра» йоча музыкальный театрын участницыже. Тушто вокал, хореографий, актёр мастарлык, журналистике занятийлаш коштеш. Тӱрлӧ мюзиклыште утларакшым тӱҥ роль-влакым модеш. Муро, куштымаш да сылнымут конкурслаште мастарлыкшым ончыкта да эре ик эн ончыл радамыш лектеш. Юстинам эсогыл «Карусель» телеканалыште ончыктеныт, – ойла Христина Кудряшова.
Юстина лӱм латин йылме гыч толын. Тудо чын верч шогышо манмым ончыкта. Тыгай лӱман ӱдыр-влак уш-акыл дене ойыртемалтыт, еҥ-влаклан полшаш эре ямде улыт, кылым вашке муын моштат. Садлан йолташыжат Юстинан шуко.