#МУЗЫКАВМЕСТЕ проект кышкарыште у видеоролик лектын
Таче, 30 ноябрьыште, «Наш сосед» мурылан у видеоклип лектын. Тудым «Кугу Элын мурыжо-влак. Юл кундем гыч йӧратен» проектын серийыштыже ямдылыме. «Наш сосед» – тиде Юл кундем федерал округын кугу музыкальный историйжын визымше главаже.
Видеороликым войзымаш ПФО-н сылне да ойыртемалтше верлаштыже эртен. Йошкар-Олаште кадр-влакым Брюгге набережныйыште да Архангельский слободаште войзымо.
Тиде мурым йоҥгалтарымашке Марий Эл гыч артист-влак Марина Воронцова ден Иван Соловьёв ушненыт. М.Шкетан лӱмеш Марий национальный драмтеатрын артисткыже Марина Воронцова проектыш ушнымо нерген тыге каласа:
– Ме Иван Соловьёв дене дуэтыште мурым йоҥгалтаренна. Лач тиде композицийым мурем манын шоналтенат кертын омыл. Тимур Ведерников дене пырля студийыште мурым возенна. Припевыште «па-па па-па-рапа па-па» манме ойыртемалтше слог-влак улыт, да кажныжым раш каласаш моткоч кӱлешан лийын.
Тимур деталь-влакым поснак тӱткын ончен, посна фрагмент-влакым уэш каласаш йодын, нотыш сайын логалмашке шуын. Профессионал да тудын коллективше дене пашам ышташ пеш сай. Клипым Архангельский слободаште войзеныт. Кече кечан да шокшо лийын, тидыже сылне атмосферым ыштен.
Тыгак Марий Элын калык артистшым, кларнетист Альберт Мусинскийым видеороликыште ужаш лиеш.Теве тудо проектыш ушнымо шотышто мом ойла:
– #МУЗЫКАВМЕСТЕ кугу проектыш ушнаш моткоч куаненам. Мылам пӱтынь командын пашаже чонеш логалын. Нуно чын профессионал улыт.
Поснак «Наш сосед» муро паша шарнымашеш кодын. Национальный сымыктыш гимназийын студийыштыже возенна, кларнет дене шоктенам. Проектын продюсерже Тимур Ведерников ятыр жап сай йӱкым возен кодаш тыршен. Тыште тудын пашалан кыртмен пижмыжым шижаш лиеш. А клипым шкеже набережныйысе гимназий ончылно войзеныт.
Э.Сапаев лӱмеш Марий кугыжаныш академический театрын проект командыже да дирижёржо Григорий Архиповлан мыланем ӱшанымыжлан да мастарлыкем ончыкташ йӧным ыштымыжлан таум каласынем.
Проект Тӱвыра инициативын президент фондын, ПФО-што Россий Федераций президентын полномочный представительын аппаратшын да «ДНК России» проектын полшымышт дене илышыш шыҥдаралтын.
Видеоролик-влак #МУЗЫКАВМЕСТЕ проектын лаштыклаштыже, тидын шотыштак ВКонтакте официальный тӱшкаште (m.vk.com/musicavmeste) да полномочный представительын сайтыштыже pfo.gov.ru/ ужаш лиеш, тыгак трансляций регионысо телевизионный каналлаште эрта.