Марий Элыште «Инфраструктура для жизни» нацпроект почеш 2025 ийыште 12 объект шотышто пашам шукташ планыш пуртымо. Тышеч шымытшым тений идалык мучаш марте чоҥышаш улыт.
Кызыт ныл объект шотышто контрактым ыштыме, кокытыштыжо пашалан пижме. Йошкар-Оласе 2-шо номеран йоча поликлиникым уэмдаш тӱҥалме. Тидлан федеральный бюджет гыч 418 млн утла теҥге ойыралтын. Кокымшо объект – Йошкар-Ола – Вӱрзым кугорнышто Немда эҥер гоч кӱвар. Тудым ачалаш федеральный бюджет гыч 487 млн теҥге колталтеш.
Ты нацпроект почешак Оршанке – Пектубай – У Торъял кугорнысо Ексей эҥер гоч кӱварым олмыктат да Йошкар-Олаште 9А микрорайонышто школым чоҥат.
Тыгак Козьмодемьянскыште, Волжский район Купсолаште, Советский посёлкышто да Йошкар-Олаште вӱдым пуышо системым уэмдат; Йошкар-Олаште 6-шо микрорайонышто 1100 веран школым чоҥаш ямдылалтыт. Кызыт проект-влаклан оксам ойырымо шотышто Российысе Чоҥымо паша министерстве дене документ ышталтеш, тылеч вара конкурсым увертарат.
