Элнан тӱрлӧ кундемыштыже, марий-шамычын тӱшкан илыме верлаштышт, ансамбль-влак чумыргеныт. Нуно марий калыкын кумда пайремыштым эреак сылнештарат. Теве Татарстан кундем Кукмарий районышто эртаралтше Семык пайремыште Набережный Челна оласе «Марий сем» ансамбльын участникше-влак дене палыме лийна. Ты ансамбль верысе марий-влак нерген элна мучко палдара, шке калыкшын тӱвыражым кӱшкӧ нӧлта да кугезына-шамычын йӱлаштым аралымылан кугу тӱткышым ойыра.
35 ияш лӱмгечыжым палемден
«Марий сем» калык-фольклор ансамбль тений 35 ияш лӱмгечыжым палемден. 1990-ше ийлаште тудым Леонид Васильевич Шабалин чумырен да шкеак вуйлаташ тӱҥалын. Эн ончыч олаште марий-шамычым поген, ушемым ыштен, вара ансамбльым шочыкташ кумылаҥын. Кызыт «Марий сем» ансамбльым чолга марий ӱдыр Евгения Анатольевна Селезнёва вуйлата. Тудо тыгерак ойла:
– Ансамбльыштына Набережный Челна олаште илыше марий-шамыч веле огытыл, тыгак Татарстан, Пошкырт, Удмуртий, Марий Эл, Виче кундемласе чолга марий-влак улыт.
Южышт икымше кече гычак ансамбльыште мурат-куштат. Нуно коллективнан аксакалже улыт. Кызыт кугурак-шамычын икшывышт да уныкашт-шамыч «Марий семыште» мастарлыкыштым таптат. Тыге кум тукым ансамбльнан чапшым арала: коча-кова-влак, самырык тукым да изирак ӱдыр-рвезе-шамыч. Пытартышыже ансамбль пеленысе «Эрвий» коллектив семын шотлалтеш.
Семык пайремыш кокымшо тукымын коллективше толын ыле. Евгениян палемдымыж почеш, такшым нуно шуко вере тӱшкан лекташ тыршат.
Фольклорлан, йӱлалан – кугу тӱткыш
«Марий сем» ансамбль утларакшым фольклор, йӱла дене кылдалтше муро-влаклан тӱткышым ойыра. Тыгак репертуарышт кызытсе илышлан келыштаралтше произведений-влаклан поян. Тыгайже молодёжьым сымыстара, манеш вуйлатыше.
– Самырык тукым шке калыкшын тӱвыражым еҥ-влак коклаште шаркалаш тореш огыл, садлан нунын шонымашыштымат шотыш налман. Тыге фольклорым да кызытсе семым ушен, произведений-влакым шочыктена. Муро-шамыч сылнын йоҥгат, тыгодым калыкын йӱла ден тӱвыражым почын пуат, – палемда Евгения Анатольевна.
Илыш дене тӧр
«Родник» Калык келшымаш пӧртыштӧ Набережный Челна олаште илыше 22 национальностьын ушемышт верланен. Нунын коклаште марий-шамычат улыт. Кажне ушемлан посна пӧлемым ойырымо. «Марий сем» ансамбльын участникше-шамыч тушто вашлийыт да тӱрлӧ йодышым лончылат. Тыгак куштымашым ямдылат, постановкым шындат, репетицийым эртарат.
– Татарстан кундемыште тӱшкан илыше марий-влакын чотыштым шотыш налаш гын, Набережный Челна ола Озаҥ деч вара кокымшо верыште шога. Эн чулымжо да чолгаже «Родник» пелен шотлалтыт. Нуно кундемнан чапшым тӱрлӧ вере аралат. Теве Семыкыш мастарлыкнам ончыкташ веле огыл толынна, тыгак конкурслаште моштымашнам тергенна. Ансамбльыштына шке патырна уло, тудо «Марий патыр» конкурсышто икмыняр гана сеҥышыш лектын, но ты гана толын кертын огыл. «Мотор марий ӱдыр» конкурсышкат кумылын ушненна. Вет мемнан дене ятыр сылне ӱдыр моштымашыжым тапта, – ойла вуйлатыше.
Евгения Анатольевнан ойлымыж почеш, «Марий сем» калыкын йӱлажым, тӱвыражым, ыштыш-кучемжым тукым гыч тукымыш шуяш кугу пашам шукта. Тидлан самырык-влакым кумылаҥда, а кызытсе саманыште молодёжьым иктаж-мом ыштыкташ куштылгыжак огыл. Набережный Челна оласе марий-шамыч тидыжым сайынак палат да илыш дене тӧр каяш тыршат.
Авторын фотожо.