Салтак илыш – пӧръеҥлан кӱлешан опыт, маныт. Лудшына-влак армийыште лийме жапыштым шарналтат.
Валерий КУДРЯШОВ, шофёр:
– 1983-1985 ийлаште Арменийысе Ереван олаште мотострелковый войскаште службым эртенам. Бронетранспортёр водитель лийынам. Службын икымше кечылаштыже чылажымат ӧрын, шинчам пашкартен онченам – мыланем, тыглай ялысе рвезылан, чылажат оҥай лийын, вет тынар оружийым, техникым икымше гана ужынам.
Икана Грузийысе Тбилиси олаш танк заводыш командировкыш колтеныт. Каныш кечын пырля служитлыше йолташем дене футболым ончаш каенна. «ДинамоМосква» ден «Динамо-Тбилиси» команде-влак модыныт. Москва гыч толшо футболист-шамыч верч болетлен шинчем, «Давай-давай!» манын пеш кычкырем. Кенета шеҥгел радамыште шинчыше ик грузин вачем гыч тӱкалтен. «Здесь так не принято, сиди молча» манын йыштак пелештен йолташем. Тунам матч пытымеш шып шинченам, кычкыралмем шумо годым кидем гына чотрак кормыжтенам.
Службым апрель мучаште тӱҥалынам ыле, мемнан дене лум шулен пытен веле гын, Ереваныште тунам кеҥеж озаланен. Икмыняр жап гыч тӱрлӧ фрукт кӱын шуын. Абрикосым, персикым, хурмам, виноградым икымше гана лач армийыште кочкын онченам. Частьна воктенак грецкий пӱкш шочеш ыле, пушеҥгыжым ломбо дене таҥастараш лиеш. Пушеҥгыште кечыше пӱкш – ужарге, мландыш камвозешат, каштан пӱкш семын ужар комжо тӧргалтеш.
Кызытсе семын тунам телефон лийын огыл, садлан мӧҥгыштӧ мо ышталтме нерген Лида шӱжарем возкален. Кажне серышым куанен, чон вургыж лудам да вашмутым сераш шинчам ыле. Салтак годсо пагыт нерген шарнымаш кызытат чоным ырыкта. Армий деч лӱдман огыл, тушто илышлан тунем толат, чыла шотыштат виянрак лият.