Салтак илыш – пӧръеҥлан кӱлешан опыт, маныт. Лудшына-влак армийыште лийме жапыштым шарналтат.
Анатолий ЛАВРЕНТЬЕВ, тракторист:
– 1988-1991 ийлаште Хабаровск олаште ВМФ-ыште служитленам, кум ий Китай границе воктене Амур эҥер дене ийын коштынам. Тунам шке кидем дене бескозыркым ыштенам, тыгайым тетла нигуштат муаш огеш лий ыле.
Виталий ден Михаил изам-влак коктынат Амурский областьыште почела служитленыт. Пел ий жапыште когыньыштын коклаште 80 наре меҥге гына лийын. Ончыч Виталий изай 1974-1976 ийлаште Сергеевка селаште Пограничный войскаште лийын, вара Миша изай 1976-1978 ийлаште Завитинск олаште Военно-транспортный авиацийыште служитлен. Тыге мемнам, кум изак-шолякым, Амур шкеж деке шӱдыралын. Чын пӧръеҥ шке элжылан служитлышаш.