Салтак илыш – пӧръеҥлан кӱлешан опыт, маныт. Лудшына-влак армийыште лийме жапыштым шарналтат.
Сергей ПОПОВ, мурызо:
– Мый Владимир олаште Россий МВД (кызыт Росгвардий) войскаште 1995-1997 ийлаште служитленам. Чаманен каласыман, ты частьым расформироватленыт. Ме военный городокнам ороленна. Ондак караульный семын коштынам, вара караул начальникын полышкалышыжлан шогалтеныт, караул начальникат лийынам. Службым сержант званий дене пытаренам.
Тазалык шотышто чарак уке гын, шкенжым пагалыше кажне рвезе армийыште служитлышаш. Армий шкеоя илаш, шонымашке шуаш, вигак, иканаште чын решенийым приниматлаш туныкта. Лишыл йолташ-влак верчат мутым кучаш, шке мутлан, ошкыллан, пашалан ответственный лияш тунемат.