Салтак илыш – пӧръеҥлан кӱлешан опыт, маныт. Лудшына-влак армийыште лийме жапыштым шарналтат.
Николай ЭМАНОВ, сулен налме канышыште:
– 1980 ийыште, Морко посёлкысо СПТУ-м трактористлан тунем пытарымеке, армийыш каенам. Эн ончыч Алтай крайысе степян Алейск олаште гвардейский ракетный дивизийыште служитленам. Вара чодыран Новоалтайск олаш колтеныт. Службо жапым порын веле шарналтем. Шукын марий лийынна. Марий кумылнам куштымаш-мурымаш гоч чӱчкыдын ончыктенна. Эсогыл руш-влакат пырля марла куштеныт. Урал марий, татар, руш, украин салтак-влак дене пырля ваш келшен служитленна. Кок ий гыч, 1982 ийыште, изирак сержант званий дене мӧҥгӧ пӧртылынам.