Ялыште шочын-кушшо улына, но ялнан да калыкнан пӱрымашыж верч чонна коржеш мо? Тыгай йӱлышӧ шӱм-чонан еҥ кызытсе илышыште моткоч шагал. Но улыт.
Морко кундемын ик эн сӧрал верыштыже ончычсо Кинер кундем верланен. Тачысе кечын куд ялнаге Морко ола шотан илемыш пура. Туге гынат шкенам Кинер вел калыкланак шотлена, вет тыште мемнан йоча пагытна эртен. А ялна иземын толеш, кундемыштына самырык вийвал еҥ-влак шагалын улыт. Но айдемым ийготшо дене огыл, а суапле пашаж дене аклат. Мемнан вершӧрыштӧ ик эн виян ончылъеҥлан Василий Егорович Коряковым шотлена. Тудо Кораксола ялнан эн чолга эргыже. Ны кӧ улам манын шкем кучымыжо уке, ны моктанымыжым нигунам колын огынал. А могай кугу да суапле пашам тудо уло ӱмыржӧ мучко шукта шке калыкшылан!
Василий Егорович мемнан семынак шке жапыштыже Шӱргыял школыш коштын, Морко СПТУ-м тунем лектын. Чонжо эре шочмо вер да калыкше верч йӱлен. Мый эше йоча пагытыштак шижынам: уло калык тудым чот пагален. Тунамак Василий Егорович пеш тале фермер ыле. Ме сентябрьыште тунемаш каена да колхоз пасуш вик пареҥгым погаш лектына ыле. А Василий Егоровичын пасушкыжо пареҥгым погаш наҥгайымылан поснак куаненна. Молан манаш гын пасу оза ӱдыр-рвезе-влакын поро пашаштым аклен моштен, тамлын пукшымыжак мом шоген.
Тачысе кечын чумыр Кинер вел калыклан эн тӱҥ пашавер – В.Е.Коряковын кучымо пилорамыштыже. Пашаеҥ-влакын мутышт почеш палем: пилораме оза пашадарымат шке жапыштыже тӱла, а кажне шочмо –каныш кече, тидыже нунылан пеш йӧнан.
Шукерте огыл Кинер кундемыште Шочмо элым аралышын кечыже эртаралте. Тиде мероприятийлан Кораксола ялын тале шочшыжо-влак: Морко ола шотан илем администраций вуйлатыше В.А.Борисов, Шӱргыял школын ончычсо директоржо Е.Н.Гаврилов, Шӱргыял школнан тренерже Ю.Р.Александров да Кораксола ялын патриотшо-влак А.Ф.Сергеев, В.С.Ильин да А.И.Иванов – вуйын шогышт. Нунын тыршымышт дене тынар эстафете, волейбол да моло таҥасымаш эртаралтыныт. Кирым нӧлтымаште Александр Пидаев сеҥышыш лектын. Палемдыман, тудын вуйын шогымыж дене кажне шошым мемнан вершӧрна арулык дене тӱзлана. Ты кечын Ярансола ялын пӧръеҥ командыже Кораксола ялын командыже ваштареш футболла модын. Пайремын эн изи участникшылан Матвей Эманов шотлалтын, тудлан пӧлек шотеш ик тортым кучыктышт.
Тыгак Кугу Ачамланде сарыште вуйым пыштыше салтак-влаклан обелиск ончыко пеледышым пыштыме. Шӱргыял школын чолга тунемшыже-влак Надежда Сергеева ден Даниэль Кугергин почеламутым чаплын рашкалтарен пуышт.
23 февраль кечым палемдаш уло окса роскотым Кинер кундемын ончылъеҥже В.Е.Коряков шке ӱмбакыже налын. Ты кечын тынар шуко шергакан пӧлек, тамле шашлык, поян кинде-шинчал – чылажат Василий Егоровичын оксаж дене толын.
Тыге эртыш Кинер кундемыштына Шочмо элым аралышын кечыжлан пӧлеклалтше пайрем. Ӱмыржӧ мучко шочмо ялже да калыкше верч тыршыше виян ончылъеҥна Василий Егоровичлан таум ойлена да тудын дене кугешнена. Тек Кинер кундем эре чаплана да тӱзлана!
Елена Григорьева, Кораксола тӱвыра пӧрт вуйлатыше.
Снимкыште: Шочмо элым аралышын кечыже уло Кинер кундем калыкым иктыш чумырен.