Шукерте огыл Морко районысо Зеленогорский школышко марий йылмым туныктышо-влак чумыргышна.
Тыште омсадӱр гычак поро шӱлыш шижалтеш. Я туныктышо, я тунемше кажне уна дене лыжган саламлалтеш. Тидыже вуйлатыше дечат шога дыр. Зеленогорский школым ынде ятыр ий Н.В.Гранатова вуйлата. 16 туныктышо 73 икшывым шинчымаш тӱня дене ончыко вӱда.
Мо эн оҥайже: школышто вич тӱрлӧ калыкын икшывыже: марий, руш, татар, чуваш да лезгин – тунемеш. Чыланат марий йылмым палат. Тыште марий кугыжаныш йылмым да ИКН предметым М.А.Воробьёва ден Н.Г.Малинина туныктат. Миральда Александровна 2017 ийыште «Марий йылмым эн сайын туныктышо» конкурсышто сеҥымыж дене Моско ола марте шуын. А Наталья Геннадьевна 2024 ийыште ты таҥасымаштак районышто сеҥышыш лектын да Морко кундемын чапшым республик кӱкшытыштӧ арален.
М.А.Воробьёва – ынде ятыр ий Зеленогорский школ директорын туныктымо паша шотышто алмаштышыже. Тудо 5-ше классыште ИКН дене «Марий тӱр» темылан виш урокым эртарыш. Марий йоча марий шомак-влакым тыге огеш шарнен код, кузе вес калыкын шочшыжо чын да раш каласа. А урок деч ӧрдыжысӧ пашам ончыктымышт годым эшеат чот кугешнаш логале. «Онар тукым» ден «Эрвий» команде «Своя игра» интеллектуал модышышто виян таҥасышт.
Н.Г.Малинина 3-шо классыште «Шошо толеш» темылан кугыжаныш марий йылме дене виш урокым пуыш. Ик урокышто туныктышо тынар шуко у йӧным кучылтын, йоча-влак дене тынар сомылым ыштен шуктеныт! Тиде чолга туныктышо Зеленогорский школышто советникын пашажым шукта.
Тыге чолга туныктышо-влак Зеленогорский школышто кажне тунемшын шӱм-чонышкыжо марий шӱлышым намиен шуктат. Ача-авашт марий йылмылан южо ганаже тореш лийыт гынат, икшывышт «Мылам марла тунемаш келша» маныт. Тидыже эн тӱҥ огыл мо? Кугезе йылмынан ончыкылыкшо – лач самырык тукымын кидыште. А самырык тукымжым ме, марий йылмым туныктышо-влак, ий гыч ийыш ончыко вӱдена.
Елена Григорьева, Морко районышто этнокультур предметлам туныктышо-влакын методушем вуйлатышышт.
Снимкыште: Зеленогорский школышто район кӱкшытан семинар годым.