Татьяна Ямбердова – талантан марий сӱретче Иван Михайлович Ямбердовын кугурак ӱдыржӧ. Палыме музыкант, скрипке да марий ковыж (изиш вестӱрлырак) дене шокта. Жапше годым Йошкар-Оласе И.С.Палантай лӱмеш музыкальный училищым тунем лектын, вара Петрозаводскысо консерваторийым пытарен. Шукертак Псков областьысе Великие Луки олаште ила да пашам ышта, йоча-шамычым туныкта. Ешан, шочшан. Таче тудын ешыже – лаштыкнан унаже.
«Кеҥежым кажне ийын ик тылзе Йошкар-Олаште ача-авам дене канем. Тушеч пӧртылмеке, телылан тӱрлӧ заготовкым ышташ тӱҥалам».
– Татьяна, тый Йошкар-Олаште шочын-кушкынат, кызыт Великие Луки олаште илет. Кузе тушко логалынат, да келша мо
тушто?
– Ты ола – Сергей пелашемын шочмо верже. Марлан лекмекем, тушко илаш кусненна. Великие Луки Йошкар-Ола деч изирак, но тушто ласка. Тыште мыйын марием шочын, тыште кок йочана ош тӱням ужын. Садлан кызыт ты олам шкемын мӧҥгемлан шотлем. Адакшым руш калыкмут уло: вер айдемым огеш чапландаре, а айдеме – верым.
– Пелашет – уста музыкант Сергей Шишков. Кушто те палыме лийында? Коктынат сем тӱняште пашам ыштеда. Пырля программе, проект-влакымат ямдыледа ала?
– Туддене ме Петрозаводскышто палыме лийынна. Ынде 14 ий пырля илена.
Мыйын марием – палыме музыкант, джазовый пианист. Уло тӱня мучко гастролироватла. Йолташыже-влак дене пырля коллективым чумыреныт. Тудын Российыште шкенжын джаз проектшевлак улыт. У ийлан, мутлан, Рошто джаз программыже пеш чапле. Ме тунам олаштына Российыште палыме уна-влакым вашлийына.
Коктын пырля программе-влакымат ямдылена. Эре огыл, молан манаш гын кажнына шке пашана дене заниматлена. Утларакшым телым, У ий пайрем каныш кечылаште, тидым ыштена, вара пырля выступатлена.
– Йочада-влакат тугеже, ача-авам ончен, музык тӱняште кушкыт?
– Тыгак лектеш. Мария ӱдырна тений 8-ше классыш кая. Тудо мыйын шочмо кечем годым, 20 сентябрьыште, ош тӱням ужын. Мария мыйын гайрак. Ӱпшат мыйын семынак кудыр. Тений музыкальный школын фортепиано классшым тунем лекте. Андрей кудымшо классыш кая. Тыгак музыкальный школыш фортепиано дене шокташ коштеш. Футбол дене заниматла. Коктынат сӱретлаш йӧратат. Кузе ме шке жапыштыже Катя шӱжарем дене сӱретленна, тугак – нунат.
– Марлан лекмеке, мотор марий фамилиетым вашталтен отыл тугеже.
– Шке фамилиемак коденам. Шке тыге шонен пыштенам. Пелашемат тунам манын: «Тыйын фамилиет пеш мотор, ойыртемалтше: Ямбердова. Тудым кодаш шонен пыштет гын, тореш ом лий».
– Еш дене пырля мом ышташ йӧратеда?
– Изи улмем годым, шарнем, авай-ачай дене пырля Шкетан лӱмеш театрыш кажне премьерым ончаш коштынна. Нуно мемнам ньогамак тушко пырля налыныт.
А кызыт ме тыгак шке ешем дене пырля икте-весынан выступленийышке коштына. Мыйын концертем годым залыште пелашем, ӱдырем ден эргым обязательно шинчат. Серёжан концертше годым, мӧҥгешла, ме эре залыште улына.
Теле каникул годым дачыш коштына. Телым да кеҥежым чодыраш лекташ йӧратена. Кеҥежым ерыште йӱштылына, тӱрлӧ емыжым погена.
– Интернетыште фото-влакым ончем да ужам: телылан тӱрлӧ заготовкым ыштылат? Садпакчада уло?
– Ме олаште илена, но шкенан пӧртна да садна уло. Тыгак – дачына. Мый чыла шындем: пареҥге гыч тӱҥалын, кешыр да шоган марте. Кеҥежым кажне ийын ик тылзе Йошкар-Олаште ача-авам дене канем. Тушеч пӧртылмеке, телылан тӱрлӧ заготовкым ышташ тӱҥалам: вареньым, шинчалтыме киярым, помидорым, тӱрлӧ салатым. Пелашем ден йочамшамыч полшат, но мый кухньышто шке рульым кучаш йӧратем. Чыла шукташ тыршем, вет телым шке сад гыч погымо емыж-саска гыч ыштыме кочкыш моткоч тамлын кая.
– Те шӱжарет дене ик кечыште шочында манын, ачада ойлен ыле. Чынак мо?
– Чын. Катя мыйын шӱжарем гына огыл, а эн лишыл йолташем. Ме кажне кечын вашла телефон дене йыҥгыртена. Чыла куан ден ойгынам пырля пайлена. Катя – кеҥежымсе полиатлон дене тӱнямбал классан спорт мастер, поро чонан айдеме.
– Талантан сӱретче Иван Михайлович Ямбердов нерген чылан палена, авада нергенат каласкалыза.
– Авам Людмила Ивановна – Перинатальный рӱдерыште социальный пашаеҥ. Тудо шыма, ласка, кажне йочаж верч тургыжланыше, поро чонан марий ӱдырамаш. Медийный еҥ огыл, шып илаш йӧрата. Ачам дене ик вер гыч улыт: Волжский район Корамас кундем гыч.
– Те пеш мотор чиеда. Волгыдо, шинчаш вигак перныше тӱсан вургемым йӧратеда? Стилистда уло мо?
– Нимогай стилистем уке. Вургемым кевытлаште наледем, ургыктымашат уке. Йӧратем моторын чияш. Тыште ачамлан таум ойлыман. Тудо изинекак сӱретшевлак, живопись гоч мемнам моторлык деке шӱмаҥден. Тӱрлӧ чия, тул вочмо, тӱс ойыртем нерген ойлен. Тиде мыйын чоныш изинекак шыҥен, садлан чыла вереат моторлыкым йӧратем. Чиемыште – поснак.
– Кугу тау, Татьяна. Вучена Йошкар-Олаште пелашет дене когыньдам концерт дене.