«А ну-ка, ӱдыр-влак» конкурсышто Советский районын чапшым аралыше Совесткий посёлкысо йоча сымыктыш школышто калык мурым туныктышо Татьяна Галкина Гран-прим сулен.
Татьяна конкурсышто моло участнице-влак деч дефилештак ойыртемалтын. Тудо марий тувырым чиен, марий сӧрастарыме ӱзгар-влакым сакен, сценыште йӱксӧ гае ийын. Артист койышыжо вигак шинчалан пернен. «Шольымлан» мурыж дене залыште шинчыше шуко еҥын шинчавӱдшым йоктарен. Конкурсын ик этапыштыжат специальный военный операцийыште вуйым пыштыше шольыжо Ваня Смородинов нерген каласкален. Ойлымыж годым йӱкшӧ чытырен, шинчавӱдшӧ погынен. Татьяна деке толын, вачыж гыч ӧндалын, лыпландарыме шуын. Кок ий эртен гынат, ака шольыж деч посна йокроклана, чонжо шортеш…
Татьяна Галкинан лӱмжӧ пытартыш жапыште Марий Эл радиошто йоҥга. Самырык ӱдырамашын кок мурыжо – «Шолымлан» да «Кушто улат, пиалем?» уло. Пытартыш мурыжым Татьяна «Идалыкысе муро-2024» концертыште шергылтен.
Т.Галкина Шернур район Шӱдымарий ялыште шочын-кушкын. Изинек мураш йӧратен. Марий мурым йӧратымаш Татьянам И.С.Палантай лӱмеш тӱвыра да сымыктыш колледжыш конден. Тудым 2013 ийыште социально-культурный паша да калык художественный усталык специальность дене тунем пытарен. Дипломым налмеке, Таня шке профессийже дене пашам ыштен огыл. Туге гынат муро тудын дене эре пырля лийын. Чон йодмыжо почеш, тӱрлӧ пашам ыштымыж годым муралтен колтен, поснак калык муро-влакым утыр йӧрата. Да 2022 ийыште Т.Галкинам Советский посёлкысо йоча сымыктыш школыш пашаш ӱжыныт. Тудо жапыште школышто лачак фольклор направленийым почаш ямдылалтыныт улмаш. Татьяна вигак келшен.
– Марий семым йӧратыше ешыште кушкынам. Ачам шке жапыштыже гармоньым шоктен муралта ыле. Ваня шольымат мурен моштен. Мый тудым гитарлан туныктенам. Шкеже гитар деч посна эше фортепианым шоктем. Мыйын шонымаште, куаным, я чон шортмым, весела кумылым але ойгым муро гоч ончыкташ лиеш. Мурен, чоннам луштарена, илышлан йывыртена, – ойла Т.Галкина.
И.Речкинын да Калык усталык рӱдерын сайтше гыч налме фото-влак.