«Муро У ий кож гай лийшаш» –

Н.Изергинын альбомжо гыч налме фото.

ойла Шернур район Кучанур ялеш шочын-кушшо, тора Йӱдвелысе Нижневартовск олаште ятыр ий илыше Николай Изергин.

Тудын лӱмжӧ шукылан палыме. Н.Изергинын возымо «Тек йӱр йӱреш…», «Сылне май», «Йӧратымашын уло юзо вий», «Коло ий эртымек» да моло мурыжым  Кужэҥер район Кугу Лаждӱр ялысе «Лӱҥгалтыш» ансамбль ятыр ий мура. Тачат нине муро-влак калык чонышто илат, эртыше, мондалтдыме пагытым порын шарныктат.

Николай Васильевич кодшо ийын Йӱдвел гыч Марий Элышке илаш пӧртылын. Таче тудын усталык пашаже кузерак вораҥын толеш? Тидын шотышто кодшо кечылаште шуко мутланышна.

– Николай Васильевич, марий муро аланыш толмо корныдам айста шергалына.

– Ешаҥмеке, Шернур посёлкыш илаш куснышна. 1990-ше ийлаште Шернур райрӱдысӧ райпошко шофёрлан пашаш пурышым. Тиде жапыштак кастене Шернур тӱвыра пӧртысӧ «Пӧлек» фольклор ансамбльыш ушнышым, тушто гитар дене муренам.  Ты коллективыште усталык корнем тӱҥале.

Тунам «Уна ӱдыр» икымше мурым коллективыште шоктышо Иван Лебедев дене пырля возышна. Тудо семым шонен, мый мутым келыштаренам. Возаш йӧратыме кумыл ачам деч куснен, шонем. Тудо шкенан райгазетыште корректорлан ыштен, тыгодым почеламутшо-влак газетыште савыкталтыныт. Почеламутым школ годсек возкаленам, но еҥ коклаш лукташ вожылынам. Мурылан мутым возымаште туныктышем поэт Тимофей Петухов лийын. Почеламутем-влак ончал лекмеке, кушто мом вашталтышашым, кузе тӧрлаш кӱлмым темла ыле.

– «Лӱҥгалтыш» ансамбль дене кылда кунам да кузе пеҥгыдемын?

– Шернур райпошто шофёрлан ыштыме годымак икана Кужэҥер район Кугу Лаждӱрыш сатум ужалаш миенам. Кевыт клуб воктене верланен. Колам, тушеч муро сем шергылтеш. Ансамбльын репетицийже каен улмаш. Ме ик рвезе дене тушко пурен ончална, мурымыштым колыштна. Тыге мый коллектив дене палыме лийым, возымо мурем-влакым нунылан темлышым.

«Лӱҥгалтыш» ансамбльлан ятыр мурым Тимофей Петухов возен. 1992-1993 ийлаште иктаж вич-куд мурым коллективлан пӧлекленам. Каныш жапыште ансамбль дене пырля мыят концертлаш кошташ тӱҥальым. Шкенан кундемыште веле огыл, эсогыл Башкирий марте шуынна ыле.

– Те Нижневартовск олаште ятыр ий иленда. Йӱдвелышке каяш мо таратен?

Умбакыже 13 январьыште лекше у номерыште лудса.