«Мемнан Сеҥымаш кечына» (Наш День Победы) акцийыш Саратов ушнен. Россий президентын Юл кундем федеральный округысо полномочный представительжын темлыме акций нерген Интернетыште материал-влак #песнипобедыПФО #нашденьпобеды хештег дене шыҥдаралтыт.
«Сеҥымаш кече» мурым Саратовыште СССР-ын калык артистше, чапланыше да чылан йöратыме опер мурызо, вокалист-влакын Глинка лÿмеш Всесоюзный конкурсын лауреатше, Саратовысе Л.В.Собинов лÿмеш кугыжаныш консерваторийын профессоржо Леонид Сметанников йоҥгалтара.
— Тиде илыш гыч кайыше-влаклан огыл, а илыше-влаклан кÿлеш! Мемнан кугезына-влакын сеҥымаш подвигыштым шарныман, мыланна тынысле кава лийже манын, нуно шке илышыштым пуэныт. Тек тиде пайрем чылалан осалым Сеҥыме кече, тÿнямбалне порылык да тыныслык пайрем лиеш! – каласен артист.
Видеороликым элыштына мӧҥгыштӧ шинчыме режимым увертарыме марте возымо. Леонид Сметанников мурым Саратов областьысе А.Шнитке лÿмеш филармонийын «Хоровой музык театр» дене пырля йоҥгалтара.
Видеосюжетым Соколовый курыкысо Сеҥымаш паркыште – Боевой да паша тоштер верланыме кава йымалсе мемориал комплексыште – сниматлыме. Тоштерын фондыштыжо 26 тÿжем утла арвер аралалтеш. Кугу Отечественный сарыште кучедалше-влакын, Совет Ушем Герой-влакын, тылыште тыршыше да моло сарыште тыныслык верч шогышо-влакын илышышт дене кылдалтше пеш шуко шарныктыш тыште уло: тисте, награде, сар технике, военный вургем да молат. Тыштак кундемысе промышленность, ялозанлык, науко, образований, тазалыкым аралыме, тÿвыра паша вияҥме негрен шуко пален налаш лиеш. Социалистический Пашан Геройжо, Кугыжаныш премийын лауреатше, Саратов областьын Почетан гражданинже-влак нергенат матераил шуко.
Ушештарена: 8 май марте Юл кундем федеральный округысо чыла регионышто «Сеҥымаш кече» муро йоҥгалтеш. А 9 майыште марафон иктешлалтеш. «Мемнан Сеҥымашна» («Наш День Победы») акцийыш але марте Мордовий, Марий Эл, Удмуртий, Башкортостан, Самара область да Татарстан, Нижегородский область ушненыт. Пермь край деч вара эстафете Саратов областьыш кусаралтын.
Сайт ден социальный сетьлаште проект нерген #нашденьпобеды, #песнипобедыПФО хештег гоч пален налаш лиеш.