Мураш йӧратыше актёр

Иван Соловьёв изиж годымак мураш йӧратен, но сценыш чӱчкыдын лектын огыл. А кызыт тудо эре калык ончылно. Соловьёв – М.Шкетан лӱмеш Марий театрын артистше семын палена. Тыгак Ваням мурызо семынат ужаш да колаш лиеш.

Тудо У Торъял район Немда-Овалже ялыште шочын-кушкын. 9-ше класс марте шочмо ялысе школышто шинчымашым поген. 10-11-ше класслам У Торъялыште тунемын.

Ваня, мураш изи годсек йӧратенам манын ойлышыч. Кунам да кузе мураш тӱҥалынат? Илышетым ала тунамак муро дене кылдаш шоненат?

10-шо классыште яра жап шукырак лекте. ГИА шеҥгелан кодын, а ЕГЭ марте эше идалык жап уло. Тунам изамын гитаржым нальым, да перкалаш тӱҥальым. Вара школышто Аван кечыжлан пӧлеклалтше мероприятий годым изам сценыште мураш темлыш. Тыге икымше гана гитар дене шоктенам.

Школышто мый обществознаний да историй дене экзаменлан ямдылалтынам, юридический шинчымашым налаш шоненам. Но 11-ше классыште тунемме годым, Шкетан лӱмеш Марий театр гыч Роман Юрьевич Алексеев ден Василий Валерианович Домрачев толыныт ыле. Марий труппым погат манын ойленыт. Шкем тергаш темлышт. Йошкар-Олаште кум тур тергымаш эртымеке, Москош Щепкин лӱмеш театральный училищыш тунемаш кайышым.

Мурен моштымаш актёр пашаште посна аклалтеш мо? Рольым шеледыме годым тидым шотыш налыт?

Театрыш толмеке, Торъял вел артист-влак лишыл мыланем лийыныт. Шарнем, Светлана Строгонова ойлен ыле, «М.Шкетан лӱмеш театр ондак музыкально-драматический маналтын, сандене мемнан артист-влак чыла ыштен моштышаш улыт». Ме, арнялан кок гана погынен, музыкальный, танцевальный репетиций-влакым эртаренна, сандене чылан гаяк мурен моштат.

Репертуарыштет мыняр муро уло?

Мый театр артист улам, сандене шкемым мурызылан ом шотло, но мураш йӧратыше артист улам. А мурызо – муро дене илыше, муро аланыште пашам ыштыше еҥ.

Мыняр муро улмым раш вашешташ неле, молан манаш гын мый акапельно мурем, тыгак гитар дене шоктен-мурем.

Эстраде ден театр муро чот ойыртемалтыт. Эстрадыште театральный мурым мураш тӱҥалат гын, ончаш толшо-влак шукынжо тыйым колышташ огыт тӱҥал.

Тений Марий Эл радион кеҥежымсе концертыштыже изат Станислав Соловьёв дене пырля мураш лектында ыле. Тылеч ончычат пырля выступатленда?

Ме пырля муренна, но шукыж годым – руш муро-влакым. Тыгак У Торъялыште «МИФ» вокально-инструментальный ансамбльна уло. Москошто тунеммем годым, 1-ше курсым пытарымеке, ялыш толынам ыле. Тунам ме ансамбльым погышна. Вара тораште тунеммемлан кӧра коштын шым керт. Кызыт гын йодмышт годым мурем.

«Тол ончыкем» муретлан клип уло. Тудым войзаш шонымаш кузе лектын?

Марина Трутникова (кызыт курчак театрын артистше) дене вашлийынна ыле. Кумылна волышо, нимом ыштыме ок шу. Икте-весе нерген кутырен шинчылтмына годым иктаж-мом уым ышташ кумыл лектын. Тунам Марина мыйын муремлан клипым войзаш темлыш. Тудо тидым ыштыше еҥ-влакым муын да кутырен келшен. Тыге клип шочын.

Умбакыжат тыгай пашам шуяш шонымаш уло мо?

Кеҥежым Параньга районысо Матародышто кинолагерь эртаралтын. Мыят миенам ыле. Тушто телефон дене сниматлен, тӱрлӧ оҥай кӱчык историй-влакым войзеныт, сандене марий темылан кӱчык кином сниматлаш шонымашем уло. Йӧн лиеш гын, иктаж-мо ала войзалтеш.

Театр паша шуко жапым налеш, но яра жапет лийме годым мом ыштет?

Ондак тӱрлӧ муро-влакым тунемам да репетироватлем ыле. Шке гыч фехтований, жонглирований дене заниматленам. Пытартыш жапыште куржталам, турникыште кечем, тыгак книгам лудам.

Мутланымына годым Ваня Томас Эдисонын афоризмым каласыш «Гений – 1% талант да 99% паша». Шижалтеш, тудын койыш-шоктышыжлан тиде ойпидыш келшен толеш. Рвезе кеч-могай пашам лийже манын ышта, тыгодым тӱрлӧ могыр гыч шке мастарлыкшым терга. Сандене чылажат сай лийже манын, шуко пашам ышта.

И.Речкинын фотожо.